Аллараа Халымаҕа төһө хаас баарын Москва учуонайдара сөмөлүөтүнэн сылдьан аахтылар.
А.Н.Северцов аатынан экологияны уонна эволюцияны үөрэтэр институтун учуонайдара — биология наукатын кандидата Софья Розенфельд уонна пилот Георгий Киртаев улууска нэдиэлэ устатыгар үлэлээбиттэр. Сөмөлүөтүнэн сылдьан хаастары аахпыттар. Бу туһунан sakha.gov.ru суруллар.
«Биһиги хомуйар үлэбит наадалаах, бултуур болдьоҕу уонна квотаны быһаарарга, көтөрү харыстыырга миэрэлэри ыларга уо.д.а. Хаастары сэргэ, туруйалары, хоптолору эмиэ ааҕабыт. Бэлиэтээн эттэххэ, авиаучуот ыытыллыбатаҕа 30-тан тахса сыл буолла. Онон чуолкай дааннайдар олус наадалар», — диэн эппиттэр.
Учуонайдар үлэлэригэр сөмөлүөт-амфибияны туһаналлар. Бу көтөр аал уу үрдүгэр олороро уонна онтон көтөрө, илдьэ сылдьарга судургута бэлиэтэнэр. «Биһиги бырайыагы өйүүбүт. Тоҕо диэтэххэ хаастар, туруйалар, кубалар туруктарын билэргэ, сөптөөх миэрэлэри ыларга хайдах баарынан, дьиҥнээҕинэн билиэхтээхпит», — — диэбит СӨ Экология, айылҕа баайын туһаныыга уонна ойуур хаһаайыстыбатыгар миниистир Сахамин Афанасьев.
+1
+1
+1
+1
+1
+1
+1