Аллараа Халымаҕа култуура киинэ өрөмүөннэнэн олохтоохтор улаханнык сэргэхсийдилэр.
2019 сыл сэтинньитигэр Аллараа Халыма оройуонун Халарча нэһилиэгин дьаһалтата «Йынэттэт» фольклор киинэ «Төрөөбүт дойду култуурата» («Культура малой родины») бырайыакка киирсэн өрөмүөннэнэригэр үбү-харчыны көрөргө уонна «Тыа сиригэр култуура тэрилтэлэрин бастыҥ үлэһиттэригэр судаарыстыба өйөбүлүгэр» субсидияҕа сайаапка биэрбиттэр.
Ол түмүгэр, федеральнай бүддьүөттэн субсидияны биэрэр туһунан сөбүлэҥ көрүллэн, кулуубу өрөмүөннүүргэ 781 700,70 кээмэйдээх үп көрүллүбүт. «Халарча нэһилиэгэ» МТ хос үбүлээһининэн суума 1 050 432,67 солк. тэҥнэспит. Итиэннэ тыа сиригэр култуура тэрилтэлэрин бастыҥ үлэһиттэригэр субсидия көрүллүбүт. Дьиэни ититии, тас өртүттэн эркини бүрүйүү, өрөмүөн үлэлэрэ ыытыллыбыттар.
«Йынэттэт» фольклор киинин дириэктэрэ Мария Бандерова:
—-Биһиги «Биир ньыгыл Арассыыйа» баартыйа «Төрөөбүт дойду култуурата» бырайыагар уонна СӨ Култуура министиэристибэтигэр, тустаан миниистир Юрий Куприяновка, тыа сирин кулууптарын уонна дьоҕус култуура тэрилтэлэрин судаарыстыба таһымыгар өйүүллэригэр махтанабыт. Өр сыллар усталарыгар тыа сиригэр, улууска, өрөспүүбүлүкэҕэ култуура сыралаах үлэтэ олох сүнньэ буоларын итэҕэйэр уонна эрэнэр энтузиастар кыһамньыларынан үлэлээтэ, — диэтэ кини.