Аллараа Бэстээхтэн пассажирдары таһар пуойас Тындаҕа диэри айаннаата, салгыы «Аллараа Бэстээх — Владивосток» хайысханан быһа айанныыр вагоннар бараллар.
Бэҕэһээ, бэс ыйын 15 күнүгэр, бастакы пассажирдар айаннаатылар. Айанньыттар 2,5 хонугунан Владивостокка тиийиэхтэрэ диэн СИА иһитиннэрэр. Пассажирдары таһар пуойас айаҥҥа турунуутун үөрүүлээх тэрээһинигэр СӨ Бырабыыталыстыбатын бэрэссэдээтэлэ Андрей Тарасенко кытынна. Кини саҥа маршруту киллэрии эрэгийиэннэр икки ардыларыгар ис туризмы эрэ сайыннарыынан муҥурдаммакка, социальнай-экэнэмиичэскэй сибээстэри бөҕөргөтүөҕүн бэлиэтээтэ.
«Арассыыйа тимир суолларын өйөбүллэринэн уонна үлэ табыллан, атын куораттарга айанныыр бириэмэни биллэ кылгаттыбыт уонна Саха сирин Уһук Илиҥҥэ чугаһатан биэрдибит. Билигин, аны, муораҕа диэри икки күнүнэн айаннаан тиийиэххэ сөп буолла. Аллараа Бэстээх -Владивосток хайысханан быһа айанныыр пуойаһынан«, — диэтэ Андрей Тарасенко.
Премьер Ил Дархан Айсен Николаев сорудаҕынан, пассажирдарга айаннара табыгастаах уонна куттала суох буоларыгар, ол иһигэр, өрөспүүбүлүкэ аэропортарыгар самолет көтөр-түһэр балаһаларын уларытан оҥорор уонна өрөмүөннүүр кэмнэригэр, атын эрэгийиэннэри кытары тырааныспарынан сибээскэ эбии схемалар оҥоһуллубуттарын бэлиэтээн эттэ.
«Саха сирин тимир суоллара» АХ генеральнай дириэктэрэ Василий Шимохин «Аллараа Бэстээх-Тында» дьону таһар саҥа пуойас үлэҕэ киириитинэн, Хабаровскайга, Благовещенскайга, Иркутскайга диэри айаннар бириэмэлэрэ лаппа кылгаабыттарын, Владивостокка 2 хонук 13 чааһынан тиийэллэрин эттэ.
«Икки бастакы вагон Владивостокка диэри айаннаата. Биир вагоҥҥа 36 миэстэлээҕиттэн — 28, иккискэ 14 миэстэҕэ билиэттэри атыыластылар. Нерюнгрига пассажирдар эбии киириэхтээхтэр, оччоҕуна вагоннар туолаллар. Бу Аллараа Бэстээх-Владивосток хайысханан айан чахчы ирдэбиллээҕин көрдөрөр. Бэлиэтээн эттэххэ, вагоннар олох саҥалар, тэриллэрэ аныгылар уонна тымныы температураҕа үлэлииргэ анаммыттар«, — диэн Василий Шимохин эбэн этэр.
«Аллараа Бэстээх-Тында» айанньыттары таһар саҥа пуойас Аллараа Бэстээхтэн күн аайы 17.00 чаастан айанныаҕа, Тындаттан — 10 ч.19 м. Тындаҕа диэри айан 23 чаас. Маны сэргэ, Владивостокка, Благовещенскайга уонна Тындаҕа диэри айанныыр быһа вагоннар сылдьыахтара.
- Билиэт сыаната барыллаан:
- Тындаҕа диэри — 3000 солк. купеҕа, плацкарт — 2100;
- Благовещенскайга диэри — купеҕа — 5200 солк., плацкарт — 3500;
- Хабаровскайга диэри — купе — 6200 солк., плацкарт — 4200;
- Владивостокка диэри — купе — 7800, плацкарт — 5300;
- Иркутскайга диэри — купе — 8200 солк., плацкарт — 5600
Мария Васильева (СИА) хаартыскаларга түһэриитэ
+1
+1
+1
+1
+1
+1
+1