Саҥа Дьыл үүнээри турдаҕына Мэҥэ-Хаҥалас улууһун Аллараа Бэстээхтээҕи Олоҥхо дьиэтигэр “Ытык күн алгыһа” тэрээһин буолан ааста.
Татьяна Маркова, “Саха сирэ”, https://edersaas.ru/
Айыы балаҕаннаах нэһилиэктэртэн: Нөөрүктээйиттэн Александра Николаева, Лоомтукаттан Мария Прокопьева, Евдокия Егорова, Төҥүлүттэн Антонина Иванова, Майаттан Спартак Афонскай саха тыынын тэнитэргэ ыытар үлэлэрин сырдаттылар. Кэпсэтиигэ Чурапчыттан, Намтан, Аллараа Бэстээхтэн, Дьокуускайтан кэлбит итэҕэлгэ үлэлэһэр дьон санааларын үллэһиннилэр.
Евдокия Решетникова, улуустааҕы “Саха итэҕэлэ” түмсүү салайааччыта:
— Бу күн бэлиэ түгэнинэн, Нам улууһун Хатырык нэһилиэгин баһылыгар Алексей Пинигиҥҥэ сахалыы тыыны тэнитэн Киһитийии майгытыгар киэҥ кэскиллээх үлэни ыытарын иһин Мэҥэ -Хаҥалас улууһун “Саха итэҕэлэ” түмсүү олохтообут үрүҥ көмүстэн кутуллубут “Хотой Айыы” бэлиэтин туттарыы сиэрэ-туома буолла. Тэрээһиҥҥэ Хатырыктан Алексей Михайлович ийэтэ Мария Никитична, икки бииргэ төрөөбүт убайдара, нэһилиэктэн барыта тохсуо буолан кэлбиттэрэ кэрэхсэбиллээх.
Ытык күн өрөгөй түгэнинэн, аан дойдуну кэрийэн саха тыынын тэнитэ сылдьар үөрэтээччи, алгысчыт Кулан аал уоту уматан алгыс түһэриитэ буолла, Үрдүкү Күүстэртэн этитии бөҕө кэллэ. Итэҕэл тэрээһинин түмүгэр айар тыыннаах төрүт дорҕоон күүһүнэн сырдык күүһү тарҕатар Тыын сэргэни туруоруу буолла. Бу күн кыттыылаахтара “Өбүгэ ситимэ”, “Тыын сэргэни туруоруу” диэн сонун сиэргэ-туомҥа ис-сүрэхтэн иэйэн-куойан кытыннылар.
18 улуус аарыгырар айанын быһа охсуутугар турар Аллараа Бэстээх Олоҥхотун дьиэтигэр сирдээх-дойдулаах, силистээх-мутуктаах дьон быһыытынан, бигэтик тирэнэн, дорҕоонноохтук саҥаран, киэҥник-холкутук тыынан, сырдык санааны тарҕатан, көхсүттэн көнтөстөөх, арҕаһыттан тэһииннээх күн улууһун дьоно, айылҕа оҕолоро буоларбытын бигэргэтэр гына иллээхтик-эйэлээхтик, хардарыта ытыктаһан-харыстаһан, түмсэн аастыбыт. Кэскилбит кэтирээтин, уруйбут улааттын! Түмсүүлээх, бэйэбитигэр бигэ эрэллээх, дьиҥ сахалыы итэҕэллээх буолуоҕуҥ! Дом!
Татьяна Маркова.