Аллараа Бэстээххэ таһаҕас терминалын (тимир суол, өрүс уонна массыына суолларын силбэһиилэригэр тырааныспар-логистика тиһигин бастакы түһүмэҕэ) үлэҕэ киллэрдилэр. Кыраан көмөтүнэн суудунаҕа таһаҕаһы тиэйдилэр.
Үөрүүлээх сиэргэ-туомҥа Айсен Николаев кытынна. Ил Дархан маны Саха сиригэр территориялары урутаан сайыннарыы дьоһун бырайыага буолар диэн ааттаата. “Тырааныспар-логистика киинэ федеральнай массыына суолларын уонна өрүс тырааныспарын силбэһэр сирдэригэр тутулунна. Манна туох-ханнык иннинэ бу сылларга тигинээн кэлбит тимир суол тырааныспара төһүү буолар. Уу суолунан сырыы кэмигэр таһаҕаһы тиэйии быыстала суох, ол иһигэр хоту улуустарга таһаҕаһы тиэйэр туһугар бу бырайыак олоххо киириэхтээх. Тутууга кыттыбыттарга махтанабын!”, — диэтэ Айсен Николаев.
Эрэгийиэн баһылыга таһаҕас терминалын тутуу үлэтэ салҕанарын туһунан эттэ. 2023 сылга манна тимир суол инфраструктурата тэриллиэҕэ, онтон – ньиэби кутар комплекс.“Туох да мөккүөрэ суох үлэ салҕаныахтаах. Кэлэр сылга манна тимир суол эмиэ баар буолуоҕа. Онтон салгыы ньиэп бородууктатын таҥастыыр кыахтаах терминалы тутуу саҕаланыаҕа. Оччоҕо эбийиэк толору кыаҕынан үлэлиэҕэ. Маны сэргэ үлэ миэстэтэ тахсыаҕа. Биһиги Аллараа Бэстээх Саха сирин бүттүүнүн тырааныспарын логистикатын киининэн буолан эрэрин көрдүбүт, онон салгыы оруола өссө улаатыаҕа”, — диэн эбэн эттэ баһылык.
Тутулла турар таһаҕас терминалын кыамтата сылга 1 мөл туоннаттан тахсар уонна 2035 сыл кэннэ 2 мөл туоннаҕа тиийиэхтээх. Бырайыагы олоххо киллэрии хоту улуустарга таһаҕаһы тиэйии көдьүүһүн үрдэтиэҕэ уонна быдан чэпчэтиэҕэ. Эбийиэги тутуу үлэтэ 2017 сыллаахха саҕаламмыта. Аттыгар Амур-Саха сирин ыллыгын тимир суол тиһэх ыстаансыйата баар, “Өлүөнэ”, “Халыма” федеральнай массыына суоллара, “Амма” өрөспүүбүлүкэ суолталаах массыына суоллара тиксэллэр. Сылаас кэмҥэ Аллараа Бэстээх бөһүөлэгин уонна өрөспүүбүлүкэ киин куоратын өрүс тырааныспара ситимниир, кыһын мууһунан суол аһыллар. Онон эбийиэк тимир суол, өрүс уонна массыына тырааныспарын быһа охсуһууларыгар тырааныспар-логистика ситиминэн буолан, бары генеральнай таһаҕастары, инертнэй матырыйааллары уонна ньиэби тутуоҕа. Бу бырайыагы олоххо киллэрии түмүгэр, 334 саҥа үлэ миэстэтэ тахсан, Мэҥэ Хаҥалас оройуонун социальнай-экэнэмиичэскэй сайдыытыгар төһүү күүһүнэн буолуоҕа. Терминал биисинэһи сайыннарыыга уонна дьыалабыай көхтөөх буолууга тырааныспарынан туһаныы боппуруоһун быһаарыаҕа.
СӨ Ил Дарханын уонна Бырабыыталыстыбатын пресс-сулууспата.
Бэлэмнээтэ Женни Стрюкова
Хаартыскалар: тустаах саайтан