Аллараа Бэстээххэ култуура киинэ дьэндэйиэ

Ааптар: 
Бөлөххө киир:

СӨ Култуура министиэристибэтэ Аллараа Бэстээххэ култуура киинин туруорсан, үп көрүллэригэр сабыдыаллаата.

РФ Бырабыыталыстыбатын Бэрэссэдээтэлэ Михаил Мишустин алтынньы 20 күнүгэр Уһук Илин сиригэр-уотугар куораттыы тииптээх бөһүөлэктэргэ култуура кииннэрин тутууну федеральнай бүддьүөттэн үбүлүүр туһунан уураахха илии баттаата. Манна киирбит аҕыс пилотнай бырайыакка Саха сирэ баар. Бу туһунан СӨ Култуура уонна духуобунай сайдыы министиэристибэтин пресс-сулууспата иһитиннэрдэ.
Култуура киинэ Аллараа Бэстээх бөһүөлэгэр тутуллуо. Онно 147,6 мөл.солк. кээмэйдээх үп «Култуура» национальнай бырайыак чэрчитинэн, федеральнай бүддьүөттэн көрүллэр. Кэккэ үлэлэр номнуо быһаарыллыбыттар, ол иһигэр, сир-уот боппуруоһа, саҥа киин хайдах буолуохтааҕа.

Өрөспүүбүлүкэ федеральнайтан үбүлээһиҥҥэ былырыыҥҥыттан суоттаммыта.  Ол эрээри, бырагырааманан харчыны тыырарга куораттыы тииптээх бөһүөлэктэр киллэриллибэтэхтэрэ харгыһы үөскэппитэ. Маныаха, СӨ Култуура министиэристибэтэ Аллараа Бэстээх олохтоохторугар култуура сайдыытын киинин тутар туһуттан, маннык бөһүөлэктэри бырагыраамаҕа киллэрэри туруорсубута. Өрөспүүбүлүкэ Ил Дархана Айсен Николаев бу этиини  РФ Бэрэсидьиэнин Уһун Илиннээҕи федеральнай уокурукка боломуочуйалаах бэрэстэбиитэлигэр Юрий Трутневка тиэрдэн, РФ Култуура министиэристибэтигэр  сорудах бэриллэрэ ситиһиллибитэ. Алтынньы 20 күнүгэр РФ премьер-миниистирэ Михаил Мишустин федеральнай бырагыраамаҕа Уһук Илин уокуругун эрэгийиэннэригэр куораттыы тииптээх бөһүөлэктэргэ култуура сайдыытын кииннэрин тутууну үбүлүүр туһунан уураахха илии баттаабыта. Балар ортолоругар Аллараа Бэстээх киирсибитэ. Сабаҕалааһын быһыытынан, тутуу болдьоҕо 2022-2023 сыллар, — диэн СӨ Бырабыыталыстыба Бэрэссэдээтэлин солбуйааччытын э.т. Сергей Местников иһитиннэрдэ.

Манна даҕатан эттэххэ, Аллараа Бэстээххэ хаарбах туруктаах мас дьиэҕэ баар Култуура дьиэтэ 1982 сыллаахха тутуллубута. Онон нэһилиэнньэ саҥа киин тутулларын олус кэтэһэр.  Оттон саҥа тутуу бөһүөлэк килбэйэр киинигэр, Ленин уулуссатыгар, былааннанар. Манна анал кылаастар, музей көрдөрөр-быыстапкалыыр сирдэр, 200 киһи олорон көрөр саалата, хаһаайыстыбаннай хос, кафе-буфет баар буолуохтара.  Дьиэ биир мэндиэмэннээх буолара сабаҕаланар.

Култуура сайдыытын киинэ — дьиэ кэргэн бииргэ астына-дуоһуйа сынньанарыгар ананар. Манна быыстапкалар ыытыллыахтара, киинэлэр көрдөрүллүөхтэрэ, устуудьуйалар, куруһуоктар тигинэччи үлэлиэхтэрэ, артыыстар кэлэн кэнсиэртиэхтэрэ.  Бу үөрэнэн хаалбыт култуурабыт дьиэлэриттэн уратыта — элбэх функцияны толорор.

Хаартыскаҕа:  СӨ Култуура уонна духуобунай сайдыы министиэристибэтэ эбийиэги бырайыактааччылары кытары көрсүһэн сүбэлэһиитин түгэниттэн, 2019 с.

https://www.sakha.gov.ru/news/front/view/id/3234083

+1
0
+1
0
+1
0
+1
0
+1
0
+1
0
+1
0