Аллараа Бэстээххэ бэртээхэй тутуу дьэндэйиэ

Бөлөххө киир:

Мэҥэ Хаҥалас улууһун Аллараа Бэстээх бөһүөлэгэр  «Демография» национальнай бырайыагынан бэртээхэй  тутуу ыытылла турар.

Бу бассейннаах, киэҥ-куоҥ саалалаах успуорт комплекса ахсынньыга үлэҕэ киириэхтээх диэн СӨ Успуорт министиэристибэтэ иһитиннэрэр. Миниистир Иннокентий Григорьев бэлиэтээбитинэн, тутуу 83 % бэлэм буолбут. Үлэ сүрүннээн ис өттүн ситэриигэ-хоторууга, муостатыгар, өһүөтүгэр, бассейныгар, уотугар-күөһүгэр, о.д.а. тигинэччи ыытыллар. Ону сэргэ, тротуарын оҥороллор.
Быһаарбыттарынан, бастакы мэндиэмэҥҥэ 503 киһи киирэн күрэхтэһиини көрөрүгэр успуорт саалата баар буолар. Биэс киһи тэҥҥэ харбыырыгар аналлаах уонна оҕолорго туспа бассейннарданар, сауна, мэдиссиинэ үлэһиттэрин, тириэньэрдэр хосторо, о.д.а. киирэллэр. Оттон иккис мэндиэмэҥҥэ остуол тенниһин оонньуурга, аэробикалыырга, о.д.а. дьарыкка саалалар, буфет,  о.д.а. анал хостор былааннаналлар.
Бу комплекска күҥҥэ 1 456 тиийэ киһи сылдьыаҕа дииллэр. Маннык баараҕай тутуу оҕо-аймаҕы усупорка тардарга, эдэр ыччаты чэгиэн, чөл олоххо көҕүлүүргэ, спортсменнар көрдөрүүлэрин тупсаралларыгар, ситиһиилэрдэнэргэ, сааһыттан тутулуга суох ким баҕалаах дьарыктанан чэбдигирэригэр ананарын бэлиэтииллэр.
СӨ Успуорт министиэристибэтэ манна даҕатан, Горнай улууһугар Бэрдьигэстээххэ элбэх функциялаах успуорт комплекса тутулла турарын иһитиннэрэр. Бу тутуу быйыл ахсынньы бүтүүтүгэр үлэҕэ киириэхтээх.
+1
0
+1
0
+1
0
+1
0
+1
0
+1
0
+1
0