Саха Өрөспүүбүлүкэтэ Арассыыйа Айылҕа ресурсаларыгар уонна экологияҕа министиэристибэтин кытары балаҕан ыйын 4 күнүгэр түһэрсибит сөбүлэһиитин быһыытынан, Аллараа Бэстээх бөһүөлэгэр кытаанах хомунаалынай бөҕү-тобоҕу (ТКО) ырытар-ыраастыыр ыстаансыйа тутуллуоҕа. Онуоха Айылҕа ресурсаларыгар уонна экология министиэристибэтин чэрчитинэн, экологическай хомуур үбүттэн хос үбүлээһин бэрээдэгинэн федерацияттан 16,3 мөл. солк субсидия, өрөспүүбүлүкэттэн 1,4 мөл. солк көрүллүөҕэ. Мэҥэ Хаҥалас улууһа эмиэ үбүлүөҕэ.
Билигин улуус дьаһалтата сылга 5 тыһ. туонна кыамталаах ТКО ыстаансыйатын тутуу бырайыагын-симиэтэтин докумуонун оҥорууга үлэлии сылдьар. Аллараа Бэстээххэ сылга 3 туонна бөх тахсар, онон ыстаансыйа Павловскай, Хомустаах, Хаптаҕай, Ороссолуода нэһилиэктэрин о.д.а. эмиэ хааччыйыаҕа. Тутуу 2019 сылтан саҕаланыаҕа. Санатан эттэххэ, экологическай хомуур үбүттэн эрэгийиэннэргэ федерация субсидията сыллата көрүллэр буолуоҕа. 2017 с. 1,33 млрд солк. суумалаах экологическай хомуур түмүллэн, эрэгийиэннэргэ бөх комплекстарын оҥорууга ананан ыытыллыбыта. Бу туһунан ОДьКХ уонна энергетика министиэристибэтин пресс-киинэ иһитиннэрэр.
Раиса Сибирякова, «Саха сирэ» edersaas.ru.