Саха сирин Бырабыыталыстыбатын Бэрэссэдээтэлин солбуйааччы Михаил Никифоров кулун тутар 23 күнүгэр ыыппыт брифинигэр Аллараа Бэстээххэ 200 туонна бурдугу тиэммит үс вагон кэлэн, сүөкэммитин туһунан «Якутоптторг» чахчытыгар олоҕуран, иһитиннэрдэ. Билигин «Якутоптторга» анаан 1205 туонна бурдуктаах 18 вагон айаннаан иһэр.
СӨ Сыана судаарыстыбаннай кэмитиэтэ иһитиннэрбитинэн, өрөспүүбүлүкэҕэ кэнники 4 күҥҥэ 19 көрүҥ бородууктаҕа (гречневай куруппа, хаппыыста, помидор уо.д.а) 1-тэн 3 бырыһыаҥҥа диэри сыана үрдээбитэ бэлиэтэммит. Оттон 13 көрүҥҥэ (моркуоп, хара чэй, сымыыт уод.а.) сыана 2 % аччааһына көстөр. Эриэппэ луук уонна апельсин сыаната оннунан турар.
Бородуукта сыанатын олоҕо суох үрдэтии иһин СӨ Сыана кэмитиэтэ 227 дьыаланы СӨ Борокуратууратыгар түһэрдэ.
Билигин Аллараа Бэстээх ыстаансыйатыгар уопсайа 93 вагон сүөкэннэ, ол иһигэр ас-үөл, норуот туттар араас табаардара уонна ньиэп бородууктата. Билиҥҥи туругунан ыстаансыйаҕа норуот туттар табаарын тиэммит уопсайа 313 вагон кэллэ. Бүгүн итинтэн 102-тин сүөкүөхтэрэ.
Арассыыйа тимир суолларынан Саха сирин ыстаансыйаларын диэки 1706 таһаҕастаах вагон айаннаан иһэр, ол иһигэр Аллараа Бэстээх ыстаансыйатыгар диэри — 1251 вагон. Уһук Илиҥҥи тимир суол ыстаансыйатыгар 807 вагон баар, итилэртэн 589-һа — Аллараа Бэстээх ыстаансыйатыгар.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Хаартыска: тустаах саайтан
Бэлэмнээтэ Женни Стрюкова