Сүрүн

«Ураһа» кэлээскэ хаһаайката төрөппүттэрин кытта Өлүөнэ очуостарыгар сынньаныаҕа (ВИДЕО)

Кэлээскэлэр куонкурустара бүгүҥҥү Дьиэ кэргэн уонна таптал күнүн олус киэргэттэ уонна үгүс дьон болҕомтотун тарта. 

Биллэн турар, Мэҥэ Хаҥалас Аллараа Бэстээҕиттэн кэлбит сүүнэ улахан «Ураһа» кэлээскэ бочуоттаах 1-кы миэстэни ылара эрдэттэн биллэрэ. Ол курдук, бэрт эрдэттэн, түмүк тахсыан иннинэ, мэктиэтигэр, суруналыыстар бу кэлээскэ хаһаайыттарын кытта кэпсэтээри уочараттаан ыллыбыт. Мин «Известия» хаһыат саайтын кэнниттэн кэпсэтээччи буоллум.

—  Николай уонна Александра Костроминнар диэн эдэр ыал биир оҕолоохпут. Кэлээскэбитин массыына үрдүгэр туу курдук сытыаран, поруому туораан, аҕаллыбыт. Тыала күүһэ бэрт буолан, сотору-сотору көтөн хаалаары гынар. Биһиги паровоз оҥоруохпутун баҕарбыппыт да, төрөппүттэрбит Саха АССР 100 сылынан сахалыы тиэмэни толкуйдуурга сүбэлээбиттэрэ. Онон аҕабынаан толкуйдаан, нэдиэлэ курдук маннык кэлээскэни оҥорбуппут, — диэн кэпсиир эдэр  ыал аҕа баһылыга Николай Костромин. Николай уонна Александра Аллараа Бэстээхтээҕи тимир суол үлэһиттэрэ эбит. Үлэлэригэр билсэн холбоспуттар. Кырачаан хаһаайка талах курдаах ураһатыттан тахсаары ытаабытыттан, хостоон таһаардылар.

Костроминнар, сэрэйбиппит курдук, 1-кы миэстэни ылан, Өлүөнэ очуостара Айылҕа пааркатыгар сынньана барар буоллулар.

… Тэрээһин бүтүүтэ Костроминнар «Ураһа» кэлээскэлэрин илдьэ бараары массыыналарыгар туруора сылдьалларын түбэһэн уһуллум. Дьэ, 1-кы миэстэни ылбыт кэлээскэ уһун айаҥҥа маннык бэлэмнэнэр эбит. Костроминнарга бу курдук олохторо өрүү ситиһии көтөллөннүн диэн алгыспытын тиэрдэбит!

Елена ПОТОЦКАЯ, «Саха сирэ» хаһыат. 

Хаартыскаҕа  ааптар түһэриитэ уонна видеоҕа устуута.

0
0
Telegram Whatsapp