Аллайыаха полицейскайдара оҕолору эҕэрдэлээтилэр...
Бэрээдэк - Олох-дьаһах

Аллайыаха полицейскайдара оҕолору эҕэрдэлээтилэр

Саха сирин полицейскайдара Саҥа дьыл иннинэ үтүө үгэс оҥостон, кыаммат-түгэммэт олохтоох ыалларга сылдьан, оҕолорго бэлэх туттараллар.

Вера МАКАРОВА, «Саха сирэ», http://www.edersaas.ru/

Маннык акцияны Аллайыахатааҕы Ис дьыала отделын полицейскайдара эмиэ сылын аайы ыыталлар. Бу отдел участковай боломуочунайдарын уонна сокуоннай саастарын ситэ илик оҕолор дьыалаларыгар салаатын учуотугар кыаммат-түгэммэт 8 ыал турар.

СӨ ИДьМ-тын пресс-сулууспата иһитиннэрбитинэн, бу күн полиция үлэһиттэрэ формаларын устан, Тымныы Оҕонньор уонна Хаарчаана көстүүмнэрин кэтэн, сылдьыбыт ыалларыгар кыра бырааһынньык тэрийдилэр. Таабырын таайтардылар, саҥа дьыллааҕы көрдөөх хоһоон аахтылар. Оҕолор барахсаттар эмиэ билэр ырыаларын-хоһооннорун билиһиннэрдилэр.

Любовь Сыроватская, Аллайыаха улууһун Ис дьыалаҕа отделын начальнигын личнэй састаабы кытта үлэҕэ көмөлөһөөччүтэ, ис сулууспа майора:

«Бу акция өйдөтөр-сэрэтэр соругу эмиэ тутуһар. Оҕолоро үөрбүт-көппүт харахтарын көрөн, аһыы утаҕынан үлүһүйэр төрөппүттэрэ сыыһаларын өйдүөхтэрэ диэн. Бэлэхтэри оҥорорбутугар, оҕолор саастарын учуоттаатыбыт. Холобура, биир сааһын туола иликтэргэ оҕо аһылыгын, арыый улахаттарга кэмпиэт туттарабыт. Кэһиилэрбитин сулууспабыт массыынатыгар тиэйэн, Тымныы Оҕонньор (дьуһуурунай көмөлөһөөччүтэ, полиция сержана Борис Баланов) уонна Хаарчаана (ИВС стажера Алена Соколова) оҕолорго үөрүү бэлэхтии айаннаатылар.

Маныаха «Инди» этнокультурнай киин дириэктэрэ Максим Ильича Дуткиҥҥа махтанабыт. Кини биһиэхэ иккис сылын көстүүмүнэн көмөлөһөр. Маннык акцияны сылын аайы тэрийиэхпит».

Вера МАКАРОВА, «Саха сирэ», http://www.edersaas.ru/

Хаартыска: Аллайыаха Ис дьыалаҕа отдела.

 

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

1 + 16 =