Хоту сытар Аллайыаха улууһун сылааһынан хааччыйыыга хайдах дьаһанан үлэлииллэр эбитий? Манна ааҕыҥ.
“СӨ ОДьКХ” ГУП Аллайыахатааҕы филиалыгар ааспыт сыл түмүктэринэн бастыҥнары наҕараадалаатылар. Ол курдук, үлэҕэ эбээһинэстэрин чиэстээхтик толорор уонна өрөспүүбүлүкэ ОДьКХ сайдыытыгар киллэрбит өҥөтүн иһин Русскай Устье сэл. хочуолунайын маастара Александра Шкулева “СӨ ОДьКХ” ГУП бэтэрээнин аатын сүктэ.
СӨ ОДьКХ уонна энергетика министиэристибэтин Бочуоттаах грамотатынан ньиэби массыынанан таһар Владимир Пшенник наҕараадаланна. “СӨ ОДьКХ” ГУП генеральнай дириэктэрин аатыттан Бочуотунай грамоталары хочуолунайдар эпэрээтэрдэрэ Тамара Бойкова, Александра Слепцова уонна Олеся Авдышева туттулар. Бөҕү дьаһайыыга исписэлиис Сергей Демин уонна суоппар Вячеслав Сухих махтал суруктарынан бэлиэтэннилэр.
Аллайыаха филиалын Бочуотунай грамотатынан наҕараадаланар чиэскэ тигистилэр: сүрүн буҕаалтыр Ольга Сухих, тырааныспарка исписэлиис Виктория Горохова, хочуолунай маастардара – Алексей Чикачев уонна Ян Степанов, автотырааныспар мэхээнньигэ Дмитрий Черниговскай, хочуолунай эпэрээтэрэ Александр Бобровскай, АДС начаалынньыгын э.т. Александр Авдышев, ууну ыраастыыр тутууларга начаалынньык э.т. Михаил Горохов, АДС диспетчерэ Мария Стрюкова, АДС элетросварщига Дмитрий Федоров уонна обходчик Василий Федоров.
Сыл устата Аллайыахатааҕы филиал салааларын ортотугар “Бастыҥ эбийиэк – 2020” куонкурус ыытыллар. Бу түмүгүнэн кыайыылааҕынан 4 №-дээх хочуолунай кэлэктиибин ааттаан, тимири иһэрдэр аппарааты туттардылар. Иккис миэстэҕэ Материальнай-тэхиньиическэй хааччыйыы кэлэктиибэ тахсан, шлифовкалыыр массыынанан наҕараадаланна. 1 №-дээх хочуолунай үлэһиттэрэ үһүс миэстэҕэ тиксэн, инструменнар нобуордарын ыллылар.
“СӨ ОДьКХ” ГУП пресс-сулууспата
Бэлэмнээтэ: Женни Стрюкова
Хаартыска: тустаах саайтан