Биһиги бибилэтиэкэбитигэр өрөспүүбүлүкэбит сахалыы тыллаах судаарыстыбаннай хаһыата “Саха сирэ” үбүлүөйүгэр аналлаах быыстапка туруоруллан, хаһыат историята дьон интэриэһин олус тарта. Быыстапка кэмигэр урут тахса сылдьыбыт “Дьулурҕан”, “Эдэр саас” сыһыарыылары эмиэ сэргээтилэр.
Аллайыаха улууһун Бөрөлөөх нэһилиэгэ саамай уһук сытар буолан, манна хаһыат уонна ыалдьыт кэлиитэ олус күндү. Ол иһин олохтоохтор “Саха сирэ” хаһыат хаһан кэлэрин кэтэһэллэр. Хаһыаты нэһилиэккэ бибилэтиэкэттэн уларсан ааҕаллар. Бөрөлөөхтөр биир дойдулаахпыт, аатырбыт суруналыыс Семен Николаевич Горохов кырдьаҕас “Кыым” уонна “Саха сирэ” хаһыаттарга үлэлээбитинэн киэн туттабыт.
Өрөспүүбүлүкэбит олоҕун, сонуннарын туһунан таһаарар сонуннаах хаһыаппыт үлэһиттэрин үбүлүөйүнэн итиитик-истиҥник эҕэрдэлиибит, ситиһиилээх үлэни баҕарабыт! Элбэх ааҕааччылар махталларынан, ситим быстыбакка сайда туруҥ.
Людмила Колесова, Аллайыаха, Чкалов сэл.
Хаартыска: ааптар ыытта