Доруобуйа

Аллайыахаҕа тэрилтэ салайааччылара быһыыны бастакынан ылбыттара

Быһыыны ылыыга Аллайыаха бастыҥнар ортолоругар ааттанна.

Тэрилтэ салайааччылара, эмчиттэр бастакынан ылбыттар. Ону хайдах тэрийбиттэрин манна ааҕыҥ.  

Бүгүн СӨ Ил Дархана Айсен Николаев өрөспүүбүлүкэҕэ быһыыны ылыы туругун туһунан этэригэр, бастыҥнар ортолоругар Аллайыаха улууһун ааттаабыта. Онон сибээстээн Аллайыаха улууһунааҕы киин балыыһа кылаабынай бырааһа Т.Н.Слепцова санаатын маннык үллэһиннэ:

— Кырдьык, улуус олохтоохторугар быһыыны ылыы наадатын туһунан өйдөтөр-биллэрэр үлэни күүскэ ыыттыбыт. Улуус тэрилтэлэрин салайааччылара тус бэйэлэринэн үтүө холобур көрдөрдүлэр. Быһыыны ылыы куттала суох уонна наадалаах диэн. Быһыыны биэрэр хас да биригээдэни тэрийбиппит. Нэһилиэктэргэ тиийэ сылдьыбыппыт. Билэргит курдук, биһиги нэһилиэктэрбит Бөрөлөөх, Быйаҥныыр, Оленегорскай, Русскай Устье тэйичич сыталлар. Онно нэһилиэнньэни кытта аһаҕастык кэпсэтэн, ыйытыыларыгар хоруйдаабыппыт.

Ону сэргэ эмп үлэһиттэрэ бэйэлэрэ эмиэ үтүө холобур көрдөрдүлэр. Бастакынан быһыыны ылбыттара. Билигин киин балыыһа кэлэктиибэ бары кэриэтэ быһыы туруортардылар, оҕолорун эмтэрэр ийэлэртэн уонна икки медотводтаах үлэһиттэртэн уратылар.

Мин Спутник v бастакы баартыйатын бэйэм тоһуйан көрсүбүтүм уонна бастакынан быһыыны ылбытым. Бу үлэ туһунан хаһыаппыт киэҥник сырдаппыта. Онон дьон вакцинаны ылыы куттала суох эбит диэн итэҕэйбитэ. Кылаабынай быраас буоларбынан дьону кытта бу хамсык кэмигэр харыстанар наадатын, чуолаан, быһыыны ылар туһунан сүбэлээбитим.

Онон аллайыахалар үтүө уопуттарын туһаныҥ!

Бэлэмнээтэ Женни Стрюкова

Хаартыска: интэриниэттэн

0
0