«СӨ ОДьКХ» ГУП генеральнай дириэктэрэ Виталий Чикачев уонна Аллайыаха улууһун баһылыга Яков Елисеев кытаанах бөҕү хомуйарга сөбүлэһии түһэристилэр.
edersaas.ru
«СӨ ОДьКХ» ГУП Саха сирин Арктическай оройуоннарыгар кытаанах хомунаалынай тобоҕу хомуйарга былырыын эрэгийиэннээҕи оператор быһыытынан талыллыбыта. Уон сыл иһигэр тэрилтэ олохтоох бэйэни салайыныы уорганнарын кытта 13 оройуоҥҥа кытаанах хомунаалынай тобоҕу хомуйан, туһаҕа таһаарыахтара.
Чокуурдаах бөһүөлэгэр тэрилтэ салаата 2019 сыл ыам ыйыттан үлэлиир, бэс ыйыттан өҥө саҥа тарыыбынан ааҕыллар. Ол кэмтэн ыла 36 былаһааккаттан 4 тыһыынча куб кытаанах бөх хомулунна.
Улуус киинигэр сайын уу суолунан эбии контейнер оҥорорго матырыйаал ыыппыттара. Аллайыахаҕа өрөспүүбүлүкэҕэ бастакынан бөҕү тус-туһунан хомуйаллар, өстүөкүлэни уонна былаастыгы тус-туһунан контейнерга уураллар.
Бөҕү хомуйар туһунан сөбүлэһии чэрчитинэн контейнердаах былаһааккалары салгыы ханна оҥороллорун быһаарыахтара, 2020 сыл бүтүөр диэри тобоҕу обработкалыыр уонна буортута суох оҥорор эбийиэги үлэлэтиэхтэрэ. Чокуурдаахха кытаанах тобоҕу тус-туһунан мунньуохтара.
«Маннык сөбүлэһиини атын арктическай оройуоннары кытта түһэрсиэхпитин наада. Кытаанах хомунаалынай тобоҕу хомуйуу ымпыгын-чымпыгын нэһилиэнньэҕэ тиэрдэргэ улуус дьаһалтатын кытта үлэлэһиэхпит», — диэн эттэ «СӨ ОДьКХ» ГУП генеральнай дириэктэрэ Виталий Чикачев. Ол туһунан тэрилтэ пресс-сулууспата иһитиннэрэр.
Хаартыска СӨ ОДьКХ» ГУП түһэриитэ
«Саха сирэ», edersaas.ru