Дьокуускайга Аллайыахаттан төрүттээхтэр Хомсомуол сүүс сыллаах үбүлүөйүгэр анаммыт көрсүһүүгэ Светлана Протопопова мелодиятыгар “Дойдум миэнэ” ырыаны астына-дуоһуйа толордулар.
Билигин ыччат хоту үлэлии барыан кэмигэр, оччолорго тус хоту хомсомуол сорудаҕынан киин улуустартан тиийэн үлэлээбиттэрин билигин сөҕө саныыгын. Итинник дьонтон биирдэстэринэн 1964-1966 сс. тиийэн хомсомуол бастакы сэкирэтээринэн үлэлээбит Иннокентий Сидоров буолар. Бу үлэлээбит сылларын туһунан кини “Ыраах, Чокуурдаахха” ыстатыйатын “Саха сирэ” хаһыакка таһаарбыт. Ахтыытын быыһыгар “Сайда тур, Чокуурдаах” диэн хоһоонун ааҕан бэйэтин саастыылаахтарын долгутта. Аҕата Аллайыахаҕа Амматтан тиийэн үлэлээбитин туһунан Владимир Нестеров эмиэ истиҥник аҕынна. Дьэ, ити курдук, бииртэн биир история кэпсэнэн истэ…
80-с сылларга оройуон хомсомуолун салайбыт Александр Сидоров мустубут дьоҥҥо бу тыйыс айылҕалаах дойдуга 1982 с. Дмитрий Шпаро, айанньыт Конюхов тиийэ сылдьыбыттарын кэпсээтэ. Бэл, Валерий Шаронов Гусинай Губаҕа бэлисипиэтинэн кытта тиийэ сылдьыбыттаах.
Дьокуускайга олорор аллайыахалары Антонида Ефимова-Корякина, авиация бэтэрээнэ Вениамин Чикачев Хомсомуол 100 сылынан эҕэрдэлээтилэр.
Чокуурдаах бөһүөлэгин эдэр баһылыга Дмитрий Шарипов бэтэрээннэргэ үбүлүөйүнэн наҕараадалары туттарыыта хоту дьон сүргэтин көтөхтө. Хомсомуол үбүлүөйдээх уордьанынан Александр Сидоров, Мария Чемерзанская, Вениамин Чикачев, Владимир Нестеров, Антонида Корякина, Станислав Стрюков наҕараадаланнылар.
Хомсомуол араас сыллардааҕы актыбыыстара Иннокентий Рехлясов, Зинаида Антонова, Людмила Козак, Роман Хорошев, Светлана Протопопова, Дария Почуева, Ольга Александрова уо.д.а. Хомсомуол КК, Саха сирин хомсомуолун өрөспүүбүлүкэтээҕи кэмитиэтин, Бэтэрээннэр улуустааҕы сэбиэттэрин грамоталарын ылар чиэскэ тигистилэр.
Бу көрсүһүүнү Аллайыахаттан анаан-минээн кэлэн тэрийбит бэтэрээннэр сэбиэттэрин бэрэссэдээтэлигэр Маргарита Ивановаҕа дириҥник махтанабыт. Үөрүүлээҕэ баар, сэбиэт хомсомуол үбүлүөйүгэр анаммыт брошюраны хомуйан таһаарбыт. Сэргэх көрсүһүүлэр маннык хатылана турдуннар!
Дьокуускайга олорор аллайыахалар.
edersaas.ru саайтка анаан.