Дьокуускай куорат баһылыгын быыбарыгар быыбардааччы 42%-а кытынна. Киин куорат олохтоохторо элбэх куолаһы Евгений Григорьев туһугар биэрбиттэр — 37 083 куолаһы. Бу туһунан Дьокуускайдааҕы быыбардыыр хамыыһыйа бэрэссэдээтэлэ Алла Самойлова иһитиннэрдэ.
«Хамыыһыйа быыбар түмүгүн сарсын биллэриэҕэ, официальнай саайтка таһаарыаҕа. Бу куоластааһыҥҥа уопсай испииһэктэн 42% быыбардааччы кыттыыны ылбыта биллэр. Куоластааһын түмүгэ маннык буолла: Евгений Григорьевка — 37 083 куолас, Виталий Обедиҥҥа — 33 228 куолас, Савва Михайловка — 9 535 куолас», — диэн Алла Самойлова иһитиннэрдэ.
Бэрэссэдээтэл бэлиэтииринэн, быыбардааччы испииһэгэр, сейф-пакеттары, бүлүтүөннэри харайыыга бэлиэтээһиннэр киирбиттэр. «Быыбардааччылартан киирбит сайаапкалар көрүллүөхтэрэ. Сейф-пакеттары уонна бүлүтүөннэри уган биэрии туһунан иһитиннэриилэр бигэргэммэтилэр. Хандьыдааттары агитациялыыр матырыйааллары тарҕатыы ИДьМ-ҥа тиксэриллибитэрэ», — диэн Алла Самойлова иһитиннэрэр.
Дьокуускай куорат баһылыгын быыбара үс күн устата — кулун тутар 26-28 күннэригэр ыытылынна. Куорат сиригэр-уотугар барыта 122 быыбардыыр учаастак тэрилиннэ, 500-тэн тахса кэтээн көрөөччү үлэлээтэ.
edersaas.ru