Алквиад Тарасов: «Анал этии соруктара олоххо киириитэ биһигиттэн улахан тутулуктаах”
Алквиад Тарасов, Горнай улууһун дьокутааттарын Сэбиэтин бэрэссэдээтэлэ:
— Ил Дархан Айсен Сергеевич үтүө үгэс быһыытынан сыл түмүгэр Анал этиитин оҥордо. Онно олох сүрүн эйгэлэрин барытын таарыйда. Үлэ ханнык хайысханан туох сыаллаах, соруктаах барыахтааҕын ыйда уонна кэлэр сыл аналын түстээтэ.
Кэлэр 2022 сылы Ийэ сылынан биллэрбитин нэһилиэнньэ астына, үөрэ иһиттэ. Саҥа, сайдыылаах көлүөнэ төрөөһүнэ, үөскээһинэ, биллэн турар, ийэни кытары ыкса сибээстээх. Кэлэр сылга ийэ буолууну өйүүргэ саҥа хайысхалар киирбиттэрэ оҕо төрөөһүнүн, элбэх оҕолоох ыал бигэ туруктаах буолуутугар туһуланаллар.
Үөрэҕирии эйгэтин стратегическай эйгэ курдук көрүллүөхтээҕин, өрөспүүбүлүкэ учууталларын уонна педагогическай уопсастыбаннаһын сийиэһин ыытарга этиитэ кэлэр көлүөнэ үрдук билиилээх, сатабыллаах, иитиилээх буоларыгар төһүү күүһүнэн буолара чуолкай.
Тыа хаһаайыстыбатын эйгэтин үбүлээһинэ улаатыытын тыа сиригэр олорор, тыа хаһаайыстыбатынан дьарыктанар дьон сэҥээрбит буолуохтаахтар. Тыа сирэ сайдар сүрүн хайысхатынан, олугунан тыа хаһаайыстыбата буолар. Бу эйгэҕэ үбүлээһин улаатыыта тыа сиригэр олорор дьон дохуоттаналларын түстүүр. Эти оҥорон таһаарыыга, оҕуруот аһын, туораахтаах култууралары үүннэриигэ көмө (субсидия) көрүҥнэрэ киирбиттэрэ үөрдэр. Айсен Сергеевич Анал этиитин соруктара олоххо киириитэ хас биирдиибититтэн улахан тутулуктааҕын өйдүөх тустаахпыт уонна кэлэр үбүлүөйдээх сыл үтүө түмүктэрдээх буоларыгар кыһаллыахтаахпыт.