Хаан-уруу, бэйэлээх бэйэтин оҕото киһилии аһаабакка-таҥныбакка, тиийбэт тирии, тарпат тараһа курдук олохтонон, оҕолортон эрэ итэҕэс сананан улаатара – алимент төлүүр эбээһинэстээх төрөппүт суобаһыгар. Уус Алдан улууһугар биир оннук аҕаҕа мировой суут уурааҕа таҕыста.
Суут быһаарбытынан, бу аҕаҕа 2016 сыллаахха суут бириистэптэрэ толоруллар дьыала (“исполнительное производство”) тэрийбиттэр. Кини 2016 сыл алтынньы 14 күнүттэн саҕалаан, үс оҕотугар 18 саастарын туолуохтарыгар диэри алимент төлүөхтээх эбит.
Онуоха баара, алименын төлөөбөккө сылдьан, уһатан-кэҥэтэн, онто кэлин тиһэҕэр, 148 тыһ. солк. кэриҥэ буолбут. Арай биирдэ эрэ 300 солк. төлөөбүт, онон бүппүт.
Бу киһи төһө да үлэлиир саастаах, инбэлиит буолбатах эрээри, Дьарыктаах буолуу киинигэр учуокка турбатах, үлэлээбэт эбит. Оҕолоругар харчынан көмөлөһөр туһуттан туох да хамсаныы оҥорботох.
Маны таһынан, бу иннинэ РФ Административнай кодексатын 5.35.1 ыстатыйатынан эппиэккэ тардылла сылдьыбыт.
Быһаарар буоллахха, алименын төлөөбөт, төлүүртэн куотунар, дохуотун дьиҥнээх сууматын кистиир биитэр соруйан аччатан көрдөрөр киһи административнай эбэтэр холуобунай эппиэккэ тардыллар. Оттон суут бириистэбэ икки сэрэтии оҥорбутун кэнниттэн, бу киһи син биир төлүүр санаата суох буоллаҕына, административнай дьыалаҕа эриллэр.
Оттон иэһин төлөөбөтөҕө түөрт ыйтан ордубут буоллаҕына, киниэхэ РФ Холуобунай кодексатын 157-с ыстатыйатынан (“Оҕону эбэтэр үлэлиир кыаҕа суох буолбут төрөппүтү иитэргэ анаммыт харчыны төлүүртэн өһөөн туран куотунуу”) холуобунай дьыала тэриллэр.
Мировой суут бу эппиэтинэһэ суох аҕаны РФ Холуобунай кодексатын 157-с ыстатыйатынан буруйдааҕынан билинэн, 6 ыйга булгуччулаах үлэҕэ уурбут. Онно ылар хамнаһыттан 5 % тутуллан иһиэхтээх. Бириигэбэр сокуоннай күүһүгэр киирбит.
Бу туһунан СӨ Борокуратууратын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.