Оҕо төрөппүттэрэ араҕыстахтарына, улахан охсууну ылар. Бу уустук кэмҥэ оҕоҕо төрөппүт иккиэн болҕомтону уурара наадалаах. Көрүү-истии, олоҕун хааччыйыы иккиэннэрин эбээһинэһэ. Оҕону үп-харчы өттүнэн хааччыйбат, көмөлөспөт төрөппүккэ алимент эбээһинэс быһыытынан сүктэриллэр.
АЛИМЕНТ — сокуоннай сааһын ситэ илик оҕоҕо эбэтэр сокуоннай сааһын сиппит эрээри олоҕун бэйэтэ кыайан хааччынар кыаҕа суох дьиэ кэргэн чилиэнигэр төлөнөр харчы. РФ Дьиэ кэргэн кодексатыгар ыйылларынан, сокуоннай сааһын ситэ илик уонна сокуоннай сааһын сиппит эрээри бэйэтин кыайан хааччыммат оҕону икки төрөппүт иккиэн хааччыйара булгуччулаахтык ирдэнэр.
Сорох түгэҥҥэ төрөппүттэр оҕоҕо төһө харчы наадатын бэйэлэрэ эйэ-дэмнээхтик быһаарсаллар, алимент төлүүр сөбүлэҥи нотариуһунан бигэргэтэллэр. Оттон өскөтүн төрөппүттэр биир санааҕа кэлбэт, мөккүһэр түгэннэригэр дьыала суут нөҥүө көрүллэр. Алимены суутунан төлөттөрөргө маҥнай иск суруллар, онтон гражданскай ирдэбилинэн тахсыбыт быһаарыыны толотторор туһунан суут бирикээһэ (исполнительнай лииһи) тахсар, ол кэннэ суут бириистэптэрин нөҥүө төлүөхтээх киһиэхэ дьыала тэриллэр.
АЛИМЕНТ КЭЭМЭЙЭ
РФ Дьиэ кэргэн кодексын 81-с ыстатыйатыгар олоҕуран, сокуоннай сааһын туола илик оҕоҕо суутунан төлөнөр алимент кээмэйэ бигэргэтиллибитэ. Өскөтүн нотариуһунан бигэргэммит сөбүлэҥ суох буоллаҕына, ый аайы төрөппүт маннык сууманы төлүүрэ ирдэнэр:
• биир оҕоҕо — дохуотун 1/4-дэ (ол эбэтэр, 25%-на);
• икки оҕоҕо — дохуотун 1/3-һэ;
• үс уонна онтон элбэх оҕоҕо — дохуотун аҥаарын (50%-нын).
Төрөппүт материальнай балаһыанньатын көрөн алимент кээмэйэ улаатыан эбэтэр төттөрүтүн кыччыан сөп. Сокуоннай сааһын ситэ илик оҕо алименыгар төрөппүт хамнаһа (хамнас аахсар тэрилтэлэрэ бары учуоттаналлар) уонна харчынан да, натуральнай да көрүҥүнэн ылар бириэмийэтэ аахсыллар.
Алимент сүрүн үлэтин дохуотуттан, ону сэргэ хос үлэтин хамнаһыттан эмиэ тутуллар. Харчыны тутуу анал кээмэйдээх буолар. Сокуоннай сааһын ситэ илик оҕоҕо бары үлэтиттэн тутуллубут харчы уопсай кээмэйэ 70%-тан үрдүө суохтаах.
Алимент харчынан эрэ төлөнөр. Суут кэмигэр эппиэттээччи алимент төлүүр төрөппүттэн бэлэх аҕаларыгар уонна кэмиттэн-кэмигэр аһынан, бородууктанан хааччыйарыгар туруорсара эмиэ баар суол. Ити — төрөппүт бэйэтин тус санаата, баҕата. Алимент аһынан-таҥаһынан, оонньуурунан, хомунаалынай төлөбүрүнэн уо.д.а. төлөммөт. Итилэр баҕа өттүнэн көмөлөһүүгэ киирсэллэр, алимеҥҥа туох да сыһыаннара суох.
АЛИМЕНЫ ТӨЛӨӨБӨТ ТҮГЭҤҤЭ
Өскөтүн төрөппүт алимены төлөөбөт түгэнигэр административнай уонна холуобунай эппиэтинэскэ тардыллар. Соруйан төлөөбөт, куотунар буоллаҕына, холуобунай миэрэ оҥоһуллар: иитэр (исправительнай) үлэҕэ ыыталлар эбэтэр биир сылга диэри көҥүлүн сарбыйаллар.
2021 сыл саҕаланыаҕыттан (биэс ый иһигэр) сокуоннай саастарын ситэ илик оҕоҕо алимент төлүүртэн куотуммут, административнай быраабы кэспит (1 ыст. 5.35.1 КоАП РФ (АППГ – 180) төрөппүккэ 349 дьыаланы тэрийбиттэр.
Балартан 320 дьыаланы суут миэрэҕэ тардыбыт: 12 дьыалаҕа административнай хаайыыны түһэрбиттэр, 298 быраабы кэһээччигэ эбэһээтэлистибэлээх үлэни болдьообуттар уонна 10 төрөппүккэ административнай ыстараабы төлүүрүгэр модьуйбуттар.
Силиэстийэ иннинээҕи бэрэбиэркэ түмүгүнэн (УК РФ 1 ч. 57 ыст. (АППГ — 97) 166 холуобунай дьыаланы көбүппүттэр. Буруйдуур аакталаах 130 холуобунай дьыаланы — суукка, 141 дьыаланы борокуруор көрүүтүгэр ыыппыттар.
Биэс ый иһигэр холуобунай буруйдааһыны толоруу кэрдииһигэр иитэр (исправительнай) үлэттэн куотуммут 25 төрөппүт көҥүлүн күөмчүлээбиттэр.
edersaas.ru
Хаартыска https://vogazeta.ru