Бу күннэргэ Дьокуускайга “Олоҥхо дойдутун оҕотобун” диэн өрөспүүбүлүкэтээҕи бэстибээл, араас улуустартан саҥа үүнэн иһэр, эдэркээн олоҥхону толорооччулар кыттыылаах ыытыллан, түмүктэнэн эрэр.
Ол курдук, кулун тутар 29 күнүгэр бээтинсэҕэ оскуола иннинээҕи саастаах оҕолор түһүлгэлэрэ, бэстибээли үөрүүлээхтик аһыы, олоҥхону олоҕурбут ньыманан бөлөҕүнэн (детсад уонна оскуола саастаахтарга) толоруу буолла.
Кырачааннар дьоҕурдарынан, дьулуурдарынан убай-эдьиий дьоннорун сөхтөрдүлэр да, долгуттулар да.
—Бүгүн, биһиги—үгүс эдэр олоҥхоһуттар кынаттанан үүнэн тахсыбыт «МИН ОЛОҤХО ДОЙДУТУН ОҔОТОБУН» өрөспүүбүлүкэтээҕи бэстибээлгэ ыалдьыттаан сылдьабын. Кэнчээри ыччаттарбытын көрөн-истэн, чахчы даҕаны, сахалар олоҥхобут барахсан кэтит кэскиллээх эбит диэн үөрдүм, — диэтэ “Ыччат олоҥхоһут” түмсүү салайааччыта Юрий Борисов.
Детсад оҕолорун түһүлгэтин түмүгэ
Бөлөҕүнэн толорууга:
I истиэпэннээх лауреат – “Мичил» бөлөх, Мэҥэ Хаҥалас улууһун «Мичил» оҕо саада, сал. Е.П.Иванова
II истиэпэннээх лауреат — «Үнүгэсчээн» бөлөх, Чурапчы улууһун Сылаҥ нэһ., «Сулусчаан» оҕо саада.
III истиэпэннээх лауреат — «Кустукчаан» бөлөх, Уус Алдан улууһун Баатаҕай нэһ., сал. С.И.Готовцева.
Биирдиилээн толорууга:
I истиэпэннээх лауреат — Туйгууна Павлова, Чурапчы ул., Чурапчы сэл., «Кэскил» оҕо саада.
II истиэпэннээх лауреат — Айтал Захаров, Нам ул., 1 Хомустаах нэһ., «Улыбка» оҕо саада
III истиэпэннээх лауреат — Анжелина Анемподистова, Чурапчы ул., Чурапчы сэл., «Улыбка» оҕо саада.
—Маны таһынан элбэх оҕоҕо анал аат иҥэрилиннэ, бэлиэ туттарылынна. Оҕолор маладьыастар. Салайааччыларга махтал!, — диир Өрөспүүбүлүкэтээҕи Олоҥхо кииниттэн Елена Протодьяконова.
Салгыы оскуола оҕолорун бөлөҕүнэн толоруулара саҕаланна.
Кулун тутар 30 күнүгэр субуотаҕа бэстибээли аһыы уонна олоҥхону олоҕурбут ньыманан толорууну истии ыытылынна.
Оттон бүгүн, кулун тутар 31 күнүгэр, олоҥхоҕо дакылааттары истии, кыайыылаахтары наҕараадалааһын уонна бэстибээли үөрүүлээхтик сабыы ыытыллар.
Олоҥхоҕо сүгүрүйээччилэр этэллэринии: “Олоҥхо олугунан уран тыл ыллыга тыргыллан, аартыкка тахсыахтын!”.
Сүрүн хаартыскаҕа: Бэстибээл I истиэпэннээх лауреата Мэҥэ Хаҥалас улууһуттан «Мичил» бөлөх.
Татьяна МАРКОВА.