«Алгыстаах аартыгынан» сайыҥҥы лааҕыр үлэтэ үөрүүлээх быһыыга-майгыга арылынна.
Тааттатааҕы «Эрэл» социальнай-реабилитационнай киин «Ура, каникулы!» социальнай бырайыагынан «Алгыстаах аартыгынан» диэн сайыҥҥы симиэнэни үөрүүлээх быһыыга-майгыга аста. Үөрүүлээх тэрээһин ийэлэргэ уонна оҕолорго анаммыт Борис Неустроев-Мандар Уус алгыһынан саҕаланна.
Быйыл сайыҥҥы симиэнэ үлэтин, болҕомтотун уустук уонна социальнай кутталлаах балаһыанньаҕа түбэспит оҕолорго уонна төрөппүттэргэ туһаайда. Симиэнэ бэс ыйын 15-25 күннэригэр күнүскү уонна кэтэхтэн киэбинэн Whatsapp, ZOOM платформаларга, киин YouTube ханаалынан ыытыллар. Сайыҥҥы симиэнэҕэ 24 дьиэ кэргэн кыттар, итинтэн 3 дьиэ кэргэн СОП (социальнай кутталлаах балаһыанньаҕа), 12 — ТЖС (уустук балаһыанньаҕа) 8 — элбэх оҕолоох дьиэ кэргэнтэн буолаллар. Барыта 30 төрөппүт, 32 оҕо.
Тэрилтэ үлэһиттэрэ дьиэ кэргэттэргэ, оҕолорго, төрөппүттэргэ анаан сайыҥҥы сынньалаҥы туһалаахтык атаарыы бырагырааматын толкуйдаабыттар. Бырагыраама иитинэн оҕолор төрөппүттэрин кытта бииргэ дьарыктаналларыгар араас маастар-кылаастар, туһалаах, умсугутуулаах, сэргэх тэрээһиннэр ыытыллаллар.
Маны таһынан, эмтээх оттору хомуйуу, айылҕаҕа хаартыскаҕа түһүү, худуоһунньук Ньругуйаана Ларионова арт-терапията, о.д.а. болҕомтону тардыахтара. Көхтөөх дьиэ кэргэттэргэ социальнай партнер Блахиров Николай Николаевич Амма эбэнэн олус интэриэһинэй устууну тэрийиэ.
«Алгыстаах аартыгынан» умнуллубат кэрэ күннэри, үөрүүнү бэлэхтииргэ, билиини-көрүүнү хаҥатарга, дьиэ кэргэн дьоллоох олохтоноругар үлэтин-хамнаһын туһаайар.
Туох баар тэрээһиннэргэ санитарнай ирдэбиллэр, быраабылалар тутуһуллаллар.
+1
+1
+1
+1
+1
+1
+1