«Алгыстаах аартык» искибиэр сибэккинэн туолла

Бөлөххө киир:

90-c сылларга Саха сирин оскуолаларын бүтэрбит ыччат Саха АССР тэриллибитэ 100 сылынан  Дьокуускай куоракка Таалай күөл үрдүгэр «Алгыстаах аартык” искибиэргэ сибэкки арааһын олортулар. Бэлиэтээн эттэххэ, өрөспүүбүлүкэ үрдүнэн ити сылларга оскуоланы бүтэрбиттэр билигин араас эйгэҕэ үлэлии-хамсыы сылдьар дьон түмсэ түһэн, сүбэлэһэн баран ааспыт сыл күһүнүгэр Дьокуускай куоракка искибиэр тутан бэлэхтээбиттэрэ. Маныаха кинилэр бэйэлэрэ харчы бырахсан, үгүс ыччаты көҕүлээн дьоһун бэлэх оҥорбуттарын туһунан сырдатан турабыт. Оттон бу аҕыйах хонуктааҕыта 90-нустар эмиэ түмсэ түһээт, самаан сайыны көрсө сибэкки арааһын искибиэргэ олордон куораппытын биллэ тупсардылар.

Екатерина Васильева, Уус Алдан улууһун Танда орто оскуолатын 90-с cыллааҕы выпускнига:
— Былырыын Автодорожнай уокуругу кытта кэпсэтэн, бииргэ үлэлэһэн НКО нөҥүө уһуйааны, оскуоланы, араас үөрэх кыһаларын бүтэрээччилэргэ анаан «Алгыстаах аартык” диэн искибиэр оҥорбуппут. Былырыын искибиэрбит таһыгар 50-ча маһы олордубуппут. Быйыл кыратык саҥардан, кырааскалаан тупсаран биэрдибит. 90-с cыллардаахха Саха сирин араас улуустарын, куорат оскуолаларын бүтэрбит выпускниктар буолан харчы кыттыһан, 400 араас көрүҥ сибэккини олортубут. Саха АССР 100 сылынан сибэккинэн ЯАССР диэн сурук таһаардыбыт. Маны таһынан Автодорожнай уокуруктар эбии 20 маһы биэрбиттэрин эмиэ олортубут. Сибэккилэрбитигэр, олордубут мастарбытыгар Таалай күөл уутуттан дэлэччи куттубут. Бу искибиэр олох аартыгар үктэнээри сылдьар уһуйаан, оскуола, орто, үрдүк үөрэх кыһаларын бүтэрбит оҕолорго, ыччакка алгыһы түстүүр ытык сиринэн буоллун диэн оҥорбуппут. Искибиэрбит оҕо-аймах, дьон-сэргэ сөбүлээн мустар, сынньанар сиринэн буолуон баҕарабыт.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0