Уопсастыба

«Алгыс» кэпэрэтиип күҥҥэ биир туонна үүтү астыыр



«Тымныы Полюһа» кэпэрэтиибэ ыраах Дьааҥы улууһугар тыа хаһаайыстыбатын үлэтин хас да көрүҥүн тэрийэн олорор.

edersaas.ru

Аҕыс нэһилиэккэ үүт тутан, үрүҥ ас уонтан тахса көрүҥүн астыыр, эккэ эмиэ үлэлиир. Ону таһынан, астыыр тиһиги быспат, кэмбинээт кыамтатын толору туһанар туһуттан, 2015 с. «Алгыс» кэпэрэтииби тэринэн, ынах сүөһүнү иитэр. Кэпэрэтиип бырабылыанньатын бэрэссэдээтэлэ Екатерина Портнягина хайдах үлэлии-хамсыы сылдьалларын туһунан биһиги ааҕааччыларбытыгар маннык кэпсиир.

Коронавирус дьаҥынан сибээстээн, дьон изоляцияланыы эрэсимиигэр олорор кэмигэр, бэйэбит оҥорон таһаарбыт экология өттүнэн ыраас, сибиэһэй уонна иҥэмтиэтинэн баай аспытынан-үөлбүтүнэн нэһилиэнньэни хааччыйар аналбытын толорон, үлэлии-хамсыы сылдьабыт. Нэһилиэктэрдээҕи сыахтарбыт уонна Дьааҥы куоратыгар баар астыыр кэмбинээппит санитарнай, бэтэринээринэй ирдэбиллэри, сэрэхтээх буолуу дьаһалларын толору тутуһан, биир өрөбүлэ суох тигинэччи үлэлииллэр. Быырпаҕар, сылгы кымыһыгар тиийэ үрүҥ ас арааһын уонна сүөһү, сылгы, сибиинньэ этиттэн фабрикат аҥаардаах аһы-үөлү оҥороллор.

Ааспыт кыһын 230 ынах сүөһүнү, ол иһигэр сүүс ыанар ынаҕы кыстаттыбыт. Пиэрмэбит кыстык базата Дьааҥы куоракка турар, оттон сайылыкпыт Дьааҥы куораттан 3,5 көстөөх сиргэ, Остуолба нэһилиэгин Ыыстаах диэн учаастагар баар. Учаастак үчүгэй мэччирэҥнээҕин таһынан, улуус кииниттэн, Баатаҕай бөһүөлэгиттэн, чугас буолан, бородууксуйаны илдьэргэ табыгастаах.

Кыһын пиэрмэ ыарахан үлэтигэр сылдьыбыт дьоммутун сынньатан, сайылыкка билигин Остуолба уонна Дьааҥы куорат олохтоохторун дуогабарынан үлэлэтэ сылдьабыт. Ол курдук, Юрий Варламов уонна Маргарита Стручкова ыанньыксыттыыллар, биирдии бэйэлэрэ 50-нуу ынаҕы ыыллар. Алексей Горохов, Айхал Стручков, Федор Софронов бостууктууллар, ынахтары ыраах сыһыыларынан мэччитэн, ыамы көтүппэккэ аҕалаллар. Александр Мамонтов уонна Артем Давыдов ньирэй көрөллөр. Пиэрмэ сэбиэдиссэйинэн бэһис сылын үлэлиир, Саха Өрөспүүбүлүкэтин тыатын хаһаайыстыбатын туйгуна Татьяна Михайлова салалтатынан хоту дойду кылгас сайынын устатыгар сүөһү уойарын-тоторун, субаннар уонна ньирэйдэр төлөһүйэллэрин, оттон ынахтар өлгөм үүтү ыаталларын туһугар сыраларын уураллар. Сайылыкка ынах ыанар уонна үүт «сүүрдүллэр» кэмигэр уматыгынан үлэлиир диисэл холбонор. Күннэтэ биир туонна үүт ыанар, ону Анна Мамонтова астыырын тута атыыга таһааран иһэбит.

Раиса Сибирякова, «Саха сирэ» edersaas.ru

0
0

Санааҕын суруй