Алеша Махаров хаамыска-хабылык маастардарын кэннигэр хаалларда
Сахалыы остуол оонньуутунан ааҕыллар хабылык, хаамыска Үөһээ Бүлүүтээҕи Манчаары күрэхтэһиитин бырагырааматыгар олохтоохтор туруорсууларынан аан маҥнай киллэриллэн турар. Онон Кэнтик нэһилиэгин кулуубугар икки күн устата сымса илиилээх, талааннаах тарбахтаах уолаттар, кыргыттар, эр дьон, дьахталлар ким бастыҥын быһаарсыахтара.
Бастакы күн оҕолор уонна доруобуйаларыгар хааччахтаах дьон күрэхтэстилэр. Оҕолорго уопсай түмүк тахса илик эрээри, уолаттарга быйыл Үөһээ Бүлүү Намын орто оскуолатын 6-с кылааһын үөрэнэн бүтэрбит Алеша Махаров аҥаардастыы бастаабыта, бэлиэр, билиннэ. Онон кини хаамысканы, хабылыгы сөргүппүт, сайыннарбыт Андрей Иванович Донской, Дмитрий Яковлевич Федотов биир дойдулаахтара хамаанданан кыайыыны ситиһиэхтэригэр, этэргэ дылы, сэмэй кылаатын киллэрдэ.
Алеша, ону тэҥэ, зачету таһынан “Күөрэгэй” диэн 10 түһүмэхтээх ааннаах хаамыска быраабылатынан күрэхтэһиигэ икки маастары, ол иһигэр бэйэтин убайын Тамерлан Махаровы кэннигэр хаалларан, кыахтаахтык бастаата. Манна сыһыаран эттэххэ, бу күрэхтэһиигэ бииргэ төрөөбүт үс Махаров оонньоото. Бүлүүтээҕи педучилищеҕа үөрэнэр, СПО хамаандатыттан киирсэр эдьиийэ Милена кыргыттарга “Күөрэгэйгэ” үһүстээтэ.
А.Махаров хабылыкка, хаамыскаҕа 2-с кылаастан дьарыктанан, маастардары “охтортуур” буолбутуттан уһуйааччылара улаханнык соһуйбаттар. Үөһээ Бүлүү остуол оонньууларыгар тренерэ, Д.Я.Федотов үөрэнээччитэ Туйаара Варламова: “Алеша аныгыскы “Манчаары оонньуутугар” диэри өссө ситиэ-хотуо, күүстээх оонньооччу буолуо”, — диэн сыаналыыр итиэннэ “Күөрэгэйи” биһирээбиттэрин эттэ. Оҕолор саҥа быраабылалаах хаамысканы биир ый иһинэн баһылаабыттар уонна 7 хаамысканан холкутук оонньуур буолбуттар.
Василий НИКИФОРОВ, «Саха сирэ» хаһыат, edersaas.ru
Ааптар хаартыскаҕа түһэриилэрэ.