Сунтаар Элгээйититтэн төрүттээх Алена Ядреева “Нэдиэлэ Кэрэ Куота” рубрикабытыгар ыалдьыттыыр. Алена 2017 сыллаахха Миирнэйдээҕи Ыччат ыһыаҕын саамай кэрэ кыыһынан буолбута. Алена үҥкүүһүт уонна экэнэмиис идэлээх, кэргэннээх, кыыс оҕолоох. Билигин оҕолору, улахан дьону үҥкүү кэрэ эйгэтигэр үөрэтэр.
Эргиччи талааннаах Алена ыйытыктарбытыгар хоруйдуур:
— Иллэҥ кэмҥэр тугу гынаҕын?
— Бириэмэбин сөпкө аттаран, туһалаахтык атаара сытыыбын. Үлэбиттэн иллэҥ кэммин дьиэ кэргэммин кытта атаарабын. Маны таһынан, оҕуруонан, араас таастарынан дьэрэкээн киэргэллэри оҥоробун.
— Ааһан эрэр нэдиэлэҕэ самаай күлбүт-үөрбүт түгэниҥ?
— Кырачаан кыысчааным көрүдьүөстэриттэн.
— Зодиак бэлиэлэригэр итэҕэйэҕин дуо?
— Соччо итэҕэйбэппин.
— Ааҕааччыларбытыгар ханнык үс сериалы уонна биир киинэни көрөллөрүгэр сүбэлиэҥ этэй?
— “Острые козырьки”, “Викинги”, “Игра престолов” сериаллары уонна “Союзники” киинэни сүбэлиибин.
— Спордунан дьарыктанаҕын дуо?
— Үҥкүүнэн дьарыктанарым бэйэтэ спорт тэҥэ буолар. Күннэтэ оҕолору уонна улахан дьону дьарыктыыбын.
— Олоххор саамай өйдөөн хаалбыт түгэниҥ?
— Оҕом күн сирин көрбүт күнэ.
— Тугу талыаҥ этэй: бигэ дуу, биир кэм уларыйа сылдьар туругу дуу?
— Бигэ буолара ордук, ол эрээри, уларыйыылар эмиэ наадалар.
— Олоххор саамай соһуччу уонна толкуйдаабакка оҥорбут быһыыҥ?
— Оннук суох, куруук өйдөөн, барытын толкуйдаан оҥоробун.
— Олоҕуҥ бүтэһик чааһын хайдах атаарыаҥ этэй?
— Кэргэммин, оҕолорбун, элбэх-элбэх сиэннэрбин, хос сиэннэрбин кытта.
— Бэйэҕэр эрэллээх киһигин дуо?
— Эрэллээхпин.
Биһ.корр., edersaas.ru