Алена Атласова: «Төрүт Сокуоҥҥа уларытыыларга социальнай хайысхаҕа улахан болҕомто ууруллубут»
Дойду бэрэсидьиэнэ Төрүт Сокуоҥҥа көннөрүүлэри киллэрэргэ Бүтүн Арассыыйатааҕы куоластааһыны муус устар 22 күнүгэр ыытыы туһунан Ыйаахха илии баттаабыта.
Төрүт Сокуоҥҥа көннөрүүлэри киллэрии туһунан уопсастыбаннас санаатын билиһиннэрэбит.
Алена Атласова, Ил Түмэн дьиэ кэргэн уонна оҕо аймах дьыалаларыгар сис кэмитиэтин бэрэссэдээтэлэ:
— Төрүт Сокуоҥҥа уларытыыларга социальнай хайысхаҕа улахан болҕомто ууруллубут. Оҕолорго болҕомто өссө күүһүрбүтүн, Арассыыйа бэлиитикэтин сүрүн приоритетын быһыытынан бигэргэтиллибитин биһириибин. Итинэн оҕолор бырааптара кэһиллибэтигэр, төрөппүт көрүүтэ-истиитэ суох хаалбыт кырачааннар бука бары дьоллоох олохтоох буолалларыгар судаарыстыба эппиэтинэс ылынар. Улахан болҕомто ыалга, дьиэ кэргэн сыаннастарыгар ууруллара эмиэ олус наадалаах уонна кэскиллээх.
Волонтер, доброволец статуһа сокуонунан бигэргэниитэ, дойдуга волонтердар хамсааһыннара биллэн-көстөн, көхтөөх буолан иһэр кэмигэр бириэмэ ирдэбилэ уонна билиҥҥи балаһыанньа көстүүтэ диэн сыаналыыбын.
Мэдиссиинэ көмөтүн оҥоруу тоҕоостоох буолара мэктиэлэммитин улахан наадалааҕынан ааҕабын. Бу Арассыыйа бары олохтоохторугар, ордук биһиги өрөспүүбүлүкэбит курдук ыраах эрэгийиэн олохтоохторугар олус улахан суолталаах.
«Саха сирэ» хаһыат, edersaas.ru