Бу 2016 сыл атырдьах ыйыгар Дьокуускай куоракка тахсыбыт суол быһылаана улахан аймалҕаны таһаарбыта: оччолорго Кангалассы бөһүөлэк орто оскуолатын дириэктэрэ Алексей Юрченко уруулга итирик олорон, икки киһини суорума суоллаабыта.
Санатар буоллахха, 2016 сыл атырдьах ыйын 22 күнүгэр Юрченко арыгы иһэн баран, «Mersedes-Benz ML-350» массыынатынан киин куорат Лермонтов уулуссатынан харах тэстэринэн айаннаан иһэн, утары суолга тахсан, «Тойота Чайзер» массыынаҕа тиийэн түспүтэ.
Ол түмүгэр, «Тойота» суоппара уонна олорсон испит киһитэ быһылаан сиригэр тыыннара быстыбыта.
Нарколог-быраас туоһулаабытынан, Юрченко испит арыгытын чаанын кээмэйэ 1,36 промилле эбит этэ. Онно кини тугу да өйдөөбөтүн туһунан быһаарыы биэрбит этэ.
Дьокуускай куорат федеральнай суутун 2016 сыл ахсынньы ыйдааҕы уурааҕынан, буруйдаах суоппар 5 сыл 6 ыйга көс-холуонньаҕа көҥүлэ быһыллыбыта итиэннэ 3 сылга массыына ыытар бырааба быһыллыбыта.
2017 сыл тохсунньутугар ити бириигэбэр көтүрүллэн, 3 сыл 11 ыйга көҥүлэ быһыллыбыта.
Онтон бэҕэһээ, кулун тутар 29 күнүгэр, Дьокуускай куорат федеральнай суута Алексей Юрченконы болдьоҕун иннинэ хаайыыттан босхолоото (УДО-нан).
Маннык уураах таһаарарыгар, суут Юрченко холуонньаҕа олорор кэмигэр үчүгэйдик характеристикаланарын, биир да сэмэтэ суоҕун, төттөрүтүн, биһирэнэр чахчыта элбэҕин уонна гражданскай ирдэһиилэргэ иэстэрин сороҕун төлөөн иһэрин учуоттаабыт.
Маны тэҥэ, буруйу оҥорбутун кэмсинэрин уонна 2017 сыл кулун тутар ыйыттан «Якутдорстрой» тэрилтэҕэ оробуочайынан үлэлиирин, онно салгыы үлэлиэҕин эмиэ учуоттаабыт.
Эмсэҕэлээччилэр аймахтара, биллэн турар, суут бу уурааҕар ончу сөбүлэспэттэр, апелляцияҕа ааһынар санаалаахтар.
Сокуоммут, хомойуох иһин, дьэ, итинник.
Биһиги корр., «Саха сирэ» хаһыат, edersaas.ru
Хаартыскалар: интэриниэттэн.