Бэҕэһээ СӨ Бырабыыталыстыбатын бэрэссэдээтэлин 1-кы солбуйааччы Дмитрий Садовников ойуур баһаарын боппуруоһугар суһал ыстаап мунньаҕын ыытта. Тэрээһиҥҥэ Ойуур хаһаайыстыбатын федеральнай агентствотын салайааччытын солбуйааччы Алексей Венглинскэй кытынна. Кини ойуур баһаардара турар кэмнэригэр өрөспүүбүлүкэ бары өттүнэн бэлэмнээҕин туһунан эттэ. Федеральнай киинтэн ыйыллыбыт этиилэр барылара олоххо киирбиттэр. «Федеральнай киин тустаах эрэгийиэҥҥэ үп көрүллүүтүн улаатыннарбытын түмүгэр, ойуур баһаарын умуруорар сулууспа исписэлиистэрин кэккэтэ улаатта уонна авиация өҥөтүн лаппа туһанар кыах үөскээтэ», – диэн Алексей Викторович диэн эттэ.
Ойуур хаһаайыстыбатын федеральнай агентствотын салайааччытын солбуйааччы Алексей Венглинскэй өрөспүүбүлүкэ бүддьүөтүттэн авиация көтөр чааһын элбэтиигэ, ойуур баһаарын умуруорар сулууспаны көрөргө-истэргэ эбии үп тыырыллара ситиһиллибитигэр, Ил Дархан Айсен Николаевка махтанна. Мунньах кэмигэр Үөһээ Дьааҥы, Өймөкөөн, Өлүөхүмэ, Уус Маайа уонна Булуҥ улуустарын баһылыктара баар балаһыанньаны иһитиннэрдилэр.
Саха сиринээҕи Гидрометеокиин начаалынньыгын солбуйааччы Татьяна Маршалик Орто Халыма улууһугар ойуур баһаара турар балаһыанньата үөскээбитин туһунан эттэ. Ону тэҥэ, Уус Маайа, Таатта улуустарыгар бэс ыйын 9-10 күннэригэр сэрэхтээх балаһыанньа турарын туһунан иһиттиннэрдэ. Бүгүн үгүс улуустарга, ону тэҥэ, Ленскэй, Уус Маайа, Өлүөхүмэ, Алдан уонна Мииринэй оройуоннарыгар этиҥ түһэрэ күүтүллэр. СӨ экологияҕа, айылҕаны туһаныыга миниистирин солбуйааччы Андрей Коноплев иһитиннэрбитинэн, бу сааскыттан барыта 28 ойуур баһаара турбут, барыта 1132 гектар иэннээх сир уокка былдьаммыт. Билиҥҥи туругунан, 5 ойуур баһаара умайар эрээри, бохсуллубуттар, умуруоруу ыытыллар.