Алексей Кулаковскайга Болгария Плиска куоратыгар пааматынньык туруордулар

Кулун тутар 26 күнүгэр саха литературатын төрүттээччи Алексей Кулаковскайга Болгария Плиска куоратыгар пааматынньык арыйдылар. Бөлүһүөккэ анаммыт бюһу “Кириллица тиэргэнэ” мусуой комплексыгар туруордулар.

Өрөспүүбүлүкэ аатыттан Саха Өрөспүүбүлүкэтин тас сибээскэ уонна норуоттар дьыалаларыгар миниистирин солбуйааччы Владимир Васильев, монумент ааптара Афанасий Романов уонна Алексей Кулаковскай сиэннэрэ Раиса уонна Лариса Кулаковскаялар кыттан, лиэнтэни үөрүүлээхтик кырыйдылар.

Тэрээһини көҕүлээччилэриттэн биирдэстэринэн Саха Өрөспүүбүлүкэтин култуураҕа уонна духуобунай сайдыыга миниистирин солбуйааччы Владислав Левочкин буолар. “Былырыын суруйааччы уонна драматург Владимир Федоров миигинниин кэпсэппитэ. Кини Болгария предпринимателэ Карен Алексанянныын саха суруйааччытыгар бюст туруорарга сүбэлэспиттэрэ, тоҕо диэтэххэ, саха алпаабыта кириллицаҕа олоҕурбутун быһыытынан. Ити баҕа санааны мин “Кулаковскай эргимтэтэ” уопсастыбаннай түмсүүнү уонна скульпторы кытта көрүһүннэрбитим”, —  диэн Левочкин кэпсээтэ.

Миниистири солбуйааччы этэринэн, скульптордар Алексей Кулаковскайга анаммыт үлэлэртэн талбыттара. “Бу – Саха сирин норуодунай худуоһунньуга Афанасий Романов. Бырайыак Болгария предпринимателин суотугар олоххо киирэр, кини бу бэлиэ түгэҥҥэ кытталларыгар биһиги бэрэстэбиитэллэрбитин ыҥырбыта”. Левочкин бэлиэтииринэн, бюст ааптара скульптураны чочуйбутун кэннэ Болгария предпринимателин суотугар тиэйэн илдьибиттэрэ.

Олохтоох бизнесмен Карен Алексанян Плиска куоракка “Кириллица тиэргэнэ” мусуой комплексын тэрийбит. Плискаҕа славян норуотун уопсай алпаабыта – Кириллица төрүттэммит. Саха алпаабыта эмиэ кириллицаҕа олоҕурарын билэн баран, Карен Алексаняҥҥа комплекска саха суруйааччытын бюһун туруорар санаа киирбитэ уонна Алексей Кулаковскайы талбыттара.

“Кириллица тиэргэнигэр” Болгария, Сербия, Арассыыйа, Украина, Белоруссия, Молдова, Македония, Монголия уо.д.а. суруйааччыларын мөссүөннэрэ туруоруллубуттар.

“Якутия24”