Алексей Колодезников уон хонук иһинэн таһаҕаһы тиэйии хаалыытын туоратарга сорудахтаата
Саха сирин Бырабыыталыстыбатын Бэрэссэдээтэлин бастакы солбуйааччы Алексей Колодезников олоҕу-дьаһаҕы хааччыйар таһаҕаһы массыынанан тиэйиигэ хаалан иһиини уон хонук иһинэн туоратары ирдээтэ. Бу сорудаҕы олунньу 18 күнүгэр СӨ Таһаҕаһы тиэйиини сүрүннээһиҥҥэ биэдэмистибэлэр икки ардыларынааҕы сүбэ мунньах кэмигэр биэрдэ.
Нэһилиэнньэ олоҕун-дьаһаҕын хааччыйыыга судаарыстыбаннай кэмитиэт бэрэссэдээтэлэ Дмитрий Лепчиков иһитиннэрэринэн, 2020-2021 сыллааҕы кыһыҥҥы кэмҥэ 767,4 тыһ. туонна таһаҕаһы тиэйиэхтээхтэр. Итинтэн олунньу 17 күнүнээҕи туругунан тиэрдиэхтээх пууннарыгар диэри 370,5 тыһ. туонна тиийдэ (48,3%).
Оттугу-уматыгы тиэйиигэ ураты хонтуруолга маннык хайысхаларга тиэйии тутуллар: Мэҥэ Хаҥалас, Өймөкөөн, Томпо, Усуйаана, Хаҥалас, Чурапчы, Эбээн Бытантай оройуоннара.
Бастакы вице-премьер суукка иһинэн тустаах кэмитиэт хаалыыны ситии болдьоҕун торумнаан киллэрэригэр сорудахтаата. Итиннэ массыына ахсаана, тиэйии кээмэйэ уонна кыһалҕалаах учаастактарга массыынаны ыытыы чопчу суруллуохтаах. Маны сэргэ Дьабарыкы Хайа шахтатыттан таас чоҕу тиэрдиигэ, Нерюнгритааҕы ГРЭС-кэ оттугу тиэрдиигэ болҕомто ууруллуохтаах
Алексей Колодезников Арктика оройуоннарыгар кутталлаах таһаҕаһы тиэйиигэ көҥүлү ылыыны уустук кыһалҕанан ааттаата. Онон СӨ ОДьКХ ГУП-ка киин оройуоннартан тиэйээччилэри Арктикаҕа ыытыыны тэрийэргэ, эбии тиэхиньикэ боппуруоһун быһаарарга эттэ. Ону сэргэ кыһыҥҥы суолу үлэлэтии соруга турар. “Кыһыҥҥы суолу оҥорууга бэдэрээтчиттэр үлэлэрин хонтуруоллааһыны хааччыйыахха, тиэйээччилэр иҥнибэккэ айанныылларын курдук”, — диэтэ кини.
Тыа хаһаайыстыбатын бородууксуйатын тиэйиигэ тохтоотоххо, тыа хаһаайыстыбатын миниистирэ Александр Атласов этэринэн, 239 туоннаны тиэйэр былаантан 10 туоннатын илдьибиттэр. Тохсунньуга улахан тымныылар турбуттара уонна саҥа массыыналар хойутаан кэлиилэрэ тардыбыт.
Мунньах түмүгүнэн бастакы вице-премьер үлэни кылгас болдьоххо толорууну өссө төгүл санатта.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан