Алексей Колодезников: Саха сирин Ил Дарханын сорудаҕынан Арктика уонна хоту бөһүөлэктэригэр “күөх рейстэр” ыытыллыахтара
Хоту ханнык улуустарга «күөх рейстэри» ыытарга быһаарбыттарый? Бу туһунан манна ааҕыҥ.
Булуҥ улууһун Таймылыыр бөһүөлэгэр эбии 4,2 туонна ас-үөл бородууктата, оттон Арктика улуустарын кэккэ нэһилиэнньэлээх пууннарыгар “күөх рейстэр” ыытыллыахтара. Бу туһунан ахсынньы 10 күнүгэр Саха сирин Бырабыыталыстыбатын бэрэссэдээтэлин бастакы солбуйааччы Алексей Колодезников иһитиннэрдэ.
Бастакы вице-премьер иһитиннэрбитинэн, хоту дойду уонна Арктика оройуоннарыгар аһылык бородууктатын Якутоптторг уонна “Туймаада-агроснаб” тиэрдибиттэр.
Өрөспүүбүлүкэ тыа хаһаайыстыбатын министиэристибэтин чахчытынан, Булуҥ улууһун Таймылыыр бөһүөлэгэр 39,5 туонна социальнай суолталаах бородуукта тиэрдиллэн, кыһыҥҥы суол туруор диэри сөп буолуохтаах.
Ол эрээри коронавирус дьаҥа туран, дьон сайыҥҥы кэмҥэ уоппускаҕа барбатаҕа, күһүн устудьуоннар Таймылыырга хаалбыттара. Ол түмүгэр аска-үөлгэ наадыйыы улааппыта.
Ол иһин Таймылыырга 4,2 туонна бородууктаны эбии тиэйэн илдьэргэ быһаарыы ылыннылар.
“Маны сэргэ өрөспүүбүлүкэ Ил Дарханын Айсен Николаев сорудаҕынан Саҥа дьыл иннинэ “күөх рейстэри” маннык нэһилиэнньэлээх пууннарга толоруохпут: Булуҥ оройуонун Таймылыыр, Найба бөһүөлэктэригэр, Аллайыаха улууһун Ньычалаах уонна Оленегорскай бөһүөлэктэригэр, Үөһээ Халыма Уһун Күөлүгэр, Дьааҥы оройуонун кэккэ бөһүөлэктэригэр, Аллараа Халыма Андрюшкинотыгар уонна Походскайыгар, Усуйаана Дьүкээгиригэр, Хайырыгар уонна Туматыгар”, — диэн эбэн эттэ Колодезников.
Бу сыалга Саха сирин Бырабыыталыстыбатын саппаас пуондатыттан 25 мөл. солкуобай көрүллүөҕэ.
“Бу ый бүтүүтэ быһа холуйан 77 туонна фруктаны, оҕуруот аһын, үүт бородууксуйатын уонна халбаһыы оҥоһуктары тиэрдиэхпит”, — диэтэ Алексей Колодезников.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан.