Алексей Колодезников Кустуурга оскуола умайбытынан суһал мунньаҕы ыытта
Эбээн Бытантай улууһун Кустуур сэлиэнньэтигэр бүгүн оскуола умайыытынан, СӨ бырабыыталыстыбатын бэрэссэдээтэлин бастакы солбуйааччы Алексей Колодезников ыксаллаах быһыы-майгы хамыыһыйатын суһал мунньаҕын ыытта.
Баһаар Кустуур сэлиэнньэтин Слепцов уулуссатыгар баар орто оскуола арочнай спортивнай саалатыттан саҕаламмыт. Баһаары утары судаарыстыбаннай сулууспаҕа иһитиннэрии, олохтоох бириэмэнэн 17.30 чааска киирбит. 20.26 чаастааҕы чахчынан, уот спорт сааланы кытта сыстыһа турар оскуола дьиэтигэр көспүт.
“Кустуур олохтоохторо кэпсииллэринэн, умайыы 17.10 чааска саҕаламмыт. Кэҥсик сыт биллибит, спорт саалатыттан буруо тахсарын көрбүттэр уонна бэйэлэрин кыахтарынан умуруоран барбыттар”, — диэн ыксаллаах быһыы-майгы хамыыһыйатын мунньаҕар СӨ Үөрэҕин уонна наукатын миниистирэ Михаил Сивцев иһитиннэрдэ.
Министиэристибэ салайааччыта этэринэн, оскуолаҕа 109 оҕо үөрэнэр, баһаар кэмигэр оскуолаҕа суохтар эбит. Улуустааҕы суһал штаб быһаарыытынан оҕолор ыраахтан олорон (дистанционно) үөрэххэ көспүттэр.
Арочнай спортивнай саала 2009 сыллаахха тутуллубут, оскуоланы кытта холбуу турбут. Билигин икки тутуу иккиэн умайа тураллар. Баһаары умуруорууга олохтоохтор кыттыбыттар, биир уу таһар массыына туһаныллыбыт, ууну СӨ ОДьКХ ГУП тепловой ситимин гидрантыттан ылаллар. Миэстэтигэр улуустааҕы үөрэх управлениетын начаалынньыга барбыт. Сотору миэстэтигэр ыксаллаах быһыы-майгы хамыыһыйатын мунньаҕа буолуоҕа.
Мунньах түмүгүнэн Колодезников сылааһынан хааччыйар эбийиэги — оскуолаттан 60 миэтэрэ турар хочуолунайы эмиэ хонтуруолга ылалларыгар сорудахтаата. Маныаха СӨ ОДьКХ ГУП олохтоох филиалын дириэктэрэ Кустуур сэлиэнньэтигэр тиийиэҕэ.
Алексей Колодезников балаһыанньаны тус бэйэтинэн кэтээн көрүөн эттэ уонна баһаары умуруорууга туох дьаһал ылылларын барытын биллэрэ туралларыгар сорудахтаата.
СӨ Ил Дарханын уонна СӨ Бырабыыталыстыбатын пресс-сулууспата.
Хаартыска: Андрей Сорокин (СИА).