Арассыыйа уонна Украина сыһыаннаһыыларыгар биир дойдулаахтарбыт санааларын этэллэр уонна бары бииргэ түмсэрбитигэр ыҥыраллар.
Алексей Колодезников, «Сахатранснефтегаз» АУо генеральный дириэктэрэ:
— Биһиги дойдубут Минскэйдээҕи Сөбүлэһии олоххо киирэрин уонна өйдөспөт буолууну дипломатия көмөтүнэн быһаарыыга сөптөөх үлэни ыыта, тэрийэ сатаата. Ол эрээри, Украина салалтата «уһун-киэҥ, иннэ-кэннэ» биллибэт дипломатиятынан баар балаһыанньаны өссө дириҥэтэн биэрдэ. Донбасска туох да буруйа суох нэһилиэнньэ күн аайы эрэйи көрө олорорун биһиги хайдах тулуйуохтаахпытый? Донецскай уонна Луганскай Норуодунай өрөспүүбүлүкэлэр инники өттүгэр статустара суох олорор түгэннэригэр, биир дойдулаахтарбытыгар сыһыан өссө сытыырхайан, балаһыанньа уустугуран иһиэх этэ.
Саха сирин нэһилиэнньэтин саастаах өттүлэрэ өйдүүр буолуохтаахтар, Украина соҕуруу өттүттэн Саха сиригэр элбэх киһи кэлэн, араас хабааннах улахан тутууларга таһаарыылаахтык күүскэ үлэлээбиттэрин. Олортон үгүстэрэ биһиэхэ олохсуйа хаалбыттара, ыал буолбуттара. Кинилэр, оҕолоро, сиэннэрэ Украинаҕа баар аймахтарын кытта өрүү сылаас, сайаҕас сыһыаны тутуһаллар, билсэ олороллор.
«Сахатранснефтегаз» АУо тыһыынчанан үлэһиттээх кэлэктиибэ бары биир киһи курдук РФ Бэрэсидьиэнэ, биһиги лиидэрбит Владимира Путин ылыммыт быһаарыныытын сөптөөҕүнэн ааҕар уонна бары биир санаанан салайтаран, түмсүүлээх буолуоххайыҥ диэн ыҥырабыт.