Ытыктабыллаах айылҕа харыстабылын үлэһиттэрэ уонна бэтэрээннэрэ! Күндү доҕоттор!
Саха Өрөспүүбүлүкэтин салалтатын аатыттан уонна тус бэйэм ааппыттан эһигини Арассыыйатааҕы тулалыыр эйгэни харыстааһын уонна Экология күнүнэн эҕэрдэлиибин!
Экологтар — биһиги баайбытын — айылҕабытын харыстыыр дьон. Бүгүн бу бырааһынньыктааҕы күнү экологтар инники кирбиигэ көрсөллөр, рейдэҕэ сылдьаллар, тыаны араҥаччылыыллар. Сайыҥҥы да куйааска, кыһыҥҥы да тымныыга төрөөбүт айылҕабыт көмүскэлигэр экология инспектордара өрүү бэлэмнэр.
Айылҕа харыстабылыгар үлэлиир бары сулууспалар, олохтоох салайыныы үлэһиттэрэ, урбаанньыттар түмсүүлэрэ уонна дьон-сэргэ барыта күүстэрин холбуур сыралаах үлэлэрин түмүгэр, сыл аайы тулалыыр эйгэни уонна айылҕаны харыстааһыҥҥа үтүө ситиһиилэр үөскүүллэр. Экологическай кыһалҕалары быһаарыыга уонна сэрэтиигэ наука уонна уопсастыба бэрэстэбиитэллэрэ улахан кылааты киллэрэллэр. Ыччат экологическай хамсааһыннара сылтан сыл көхтөөхтүк кыттара көстөр. Ити барыта өссө төгүл биири дакаастыыр: айылҕа харыстабылын боппуруостарыгар сыһыаны уларытыыга сүрүн хамсааһынынан биһиги бэйэбит, дьоммут-сэргэбит санаата буолар.
Биһиги иннибитигэр биир сомоҕолоһууну, түмсүүнү эрэйэр улахан соруктар тураллар. Бары биир киһи курдук санааланан үлэлээтэхпитинэ, айылҕабытын чөл туруктаах хаалларан, кэлэр көлүөнэлэргэ тиэрдэр кыахтаахпыт. Айылҕаны харыстаан — биһиги инники кэскилбитин харыстыыбыт.
Үрдүгүтүгэр ыраас халлааны, сырдык күнү, анныгытыгар силигилиир күөх оту баҕарабын! Дьолу, доруобуйаны уонна профессиональнай ситиһиилэри!
СӨ Бырабыыталыстыбатын бэрэссэдээтэлин маҥнайгы солбуйааччы Алексей Колодезников