Алексей Колодезников: «Бэс Күөлүгэр гаас ситимэ 20 күн иһинэн чөлүгэр түһэриллиэҕэ»
Горнай улууһун Бэс Күөлүгэр ойуур баһаара имири сотон ааспыт инфраструктуратын чөлүгэр түһэрии саҕаланна. Олортон биирдэстэрэ – гаас ситимин өрөмүөннээһин буолар. «Сахатранснефтегаз» АУо генеральнай дириэктэрэ Алексей Колодезников Бэс Күөлүгэр гаас ситимин 20 күнүнэн чөлүгэр түһэриллиэҕин туһунан РФ Ыксаллаах быһыыга-майгыга миниистирэ Евгений Зиничевкэ иһитиннэрдэ.
Санатар буоллахха, бэҕэһээ РФ Ыксаллаах быһыыга-майгыга миниистирэ Евгений Зиничев уонна Ил Дархан Айсен Николаев Бэс Күөлүгэр тиийэн, тустаах боппуруостары быһаарыыга мунньах тэрийбиттэрэ.
«Билигин «Сахатранснефтегаз» АУо Бэс Күөлүгэр ойуур баһаара сиэн ааспыт сирин-уотун ыраастааһыҥҥа көмөлөһөр. Ол курдук, бульдозербытын, погрузчикпытын, самосвалларбытын уонна биригээдэбитин анаан-минээн аҕаллыбыт. Биригээдэ билигин улахан кээмэйдээх бөҕү эрбээн эрэр, тоҕо диэтэххэ, тиэйэргэ чэпчэки буолуо этэ. Биһиги тиэхиньикэлэрбит умайбыт сири ыраастааһын үлэтэ үмүрүйүөр диэри сылдьыахтара.
Гаас ситимин чөлүгэр түһэрии былаана бигэргэннэ. Онон олохтоох дьаһалта умайбыт дьиэлэр оннуларыгар тутуллуохтаах дьиэлэр учаастактарын ыйдаҕына, тустаах үлэни тута саҕалыахпыт», — диэн Алексей Колодезников иһитиннэрдэ.
⠀