Алексей Колодезников: «10 мөлүйүөн солкуобай баһаартан эмсэҕэлээбит аграрийдарга туһуланар»
Саха Өрөспүүбүлүкэтин бырабыыталыстыбатын бэрэссэдээтэлин бастакы солбуйааччыта Алексей Колодезников тустаах министиэристибэлэргэ баһаарга былдьаммыт оттоох дьоҥҥо-сэргэҕэ, хаһаайыстыбаларга көмөнү түргэтэтэргэ диэн соруйда.
edersaas.ru
Санатар буоллахха, Ил Дархан Айсен Николаев баһаар уотуттан эмсэҕэлээбит хаһаайыстыбалаах дьоҥҥо хайаан да көмөнү оҥорор туһунан сорудахтаабыта.
Билиҥҥи туругунан аҕыс улууска уопсайа 2170 туонна от баһаарга былдьаммыт.
«Муниципалитет дьаһалталарыттан аакталары күүтэбит. Билигин хас биирдии оройуоҥҥа хоромньуну суоттуу сылдьаллар. Эмсэҕэлээбиттэргэ быһа барыллаан 10 мөлүйүөн солкуобай сууманы көрдүбүт», — диэн Тыа хаһаайыстыбатын миниистирин солбуйааччы Николай Афанасьев эттэ.
Алексей Колодезников маннык аактата суох уурааҕы толорор кыаллыбат диэн тоһоҕолоон эттэ. «Онон хас биирдии муниципалитет тахсыбыт хоромньуну суоттуу охсон, тыа хаһаайыстыбатын министиэристибэтин аатыгар ыыта охсоро ирдэнэр. Үлэ балаҕан ыйын 17 күнүттэн ыытыллар эрээри, биир да сайаапка туола илик. Баһаардар соторутааҕыта эрэ тохтоотулар. Онон, биллэн турар, аактаны оҥоруу ситэ илик. Ол да буоллар докумуону оҥорууну тэтимирдэр кэрэх. Дьиҥэр, хоромньулаах дьон ахсаана олус элбэх буолбатах. Баһылыктар докумуону кэмигэр туттаралларын гына күнү болдьоон, докумуона сиппит-хоппут дьоҥҥо уһаппакка, харчынан көмөнү биэрэн иһэр наада. Хас биирдии туонна оту харчынан толуйуу, хас биирдии төбө сүөһү кыстыгы этэҥҥэ туоруурун мэктиэтэ буолар», — диэн түмүктээтэ.
Ирина Ханды, “Саха сирэ” хаһыат, edersaas.ru
Хаартыска: СИА