Бэҕэһээ бырабыыталыстыба бэрэссэдээтэлин бастакы солбуйааччы Алексей Колодезников Нам улууһугар Аппааны нэһилиэгин отчуттарыгар, Тумачча, Ойоҕос, Туора Күөл уонна Эбэ учаастактарыгар сырытта.
edersaas.ru
Тыа хаһаайыстыбатын миниистирэ Александр Атласов быйыл киин уонна илин эҥээр улуустарга кураан буолан, аһыҥа туран, былааннаах от 90 %-а (423 тыһ. т) оттонор кыахтааҕын, билигин уон биир улууска ыраах көһөн оттуур 170 мобильнай биригээдэни тэрийэр үлэ ыытылларын иһитиннэрдэ.
– Мобильнай биригээдэлэри оттугунан-уматыгынан хааччыйыыга итиэннэ кинилэр оттообут отторун тиэйиигэ саппаас пуондаттан 26 мөл. солк. көрөргө былаанныыбыт. Ил Дархан ис кыахтары туһанан, бэйэ сиригэр-уотугар оттоон, кыстыыр оту хааччынар соругу туоруорар, – диэтэ Алексей Колодезников.
– Бу учаастакка отучча сыл оттоон кэллибит даҕаны, сыл аайы үүнүү мөлтөөн иһэр. Холобур, быйыл саас төһө эмит өрүс уута угуттаан ааспытын үрдүнэн, аанньа үүммэтэх. Ол да буоллар, санаабытын түһэрбэппит, туох сэрбэйбитинэн сирийэн оттуу сылдьабыт, – диэн кэпсээтэ хаһаайыстыба баһылыга Евдокия Иванова.
Ити курдук, намнар сүөһү-сылгы ахсаанын аччаппат туһугар, бары күүстэрин ууран, оттуу сылдьалларын туһунан Тыа хаһаайыстыбатын министиэристибэтэ иһитиннэрэр.
Раиса Сибирякова, «Саха сирэ» edersaas.ru