Маны аах Уопсастыба

Алексей Федотов: «Бороҕон тутуу былаһааккатыгар кубулуйда»

Эһиил Уус Алдан улууһугар ХХХ Саха сирин норуоттарын спортивнай оонньуулара ыытыллаары турар. Уус Алдан киинэ, Бороҕон лоп бааччы 25 сыл буолан баран, эмиэ өрөспүүбүлүкэ олохтоохторун Мүрү алаас туонатыгар көрсүөҕэ. Ол эрээри, күрэхтэһии болдьоҕо ыган кэллэ. Бастаан, Амма оонньуулара биир сылга көһөрүллүбүтэ, аны аан дойдуну аймаабыт хамсык үлэ хаамыытын атахтатар. Уус Алданнар бу туһунан туох санаалаахтарый?

 

Бүгүн, муус устар 28 күнүгэр, Бэчээт дьиэтин медиа-киинигэр Уус Алдан улууһун баһылыга Алексей Федотов, СӨ инновацияҕа, цифровой сайдыыга уонна инфокоммуникацияҕа министиэристибэтин көрдөрөр-иһитининнэрэр эйгэ отделын салайааччыта Станислав Софронов, Мүрү нэһилиэгин дьаһалтатын баһылыга Василий Аммосов, СӨ суруналыыстарын сойууһун бэрэссэдээтэлэ Галина Бочкарева  кыттыылаах төгүрүк остуол ыытылынна. Мунньахха эһиил ыыттыллыахтаах Саха сирин норуоттарын спортивнай оонньууларын тула кэпсэттилэр.

Уус Алдан улууһун баһылыга Алексей Федотов оонньууларга бэлэм бастакы, иккис түһүмэхтэрэ түмүктэнэн, билигин үлэ тэрээһинэ олугун буолла диэн эттэ.

— Бүгүҥҥү күҥҥэ улуус киинэ бэйэтэ тутуу улахан былаһаакката буолан турар. Бу иннинэ күрэхтэһии улууска ыытылларын ситиһии,  докумуоннары бэлэмнээһин, инфраструктура сүрүн олоҕун оҥоруу түһүмэҕэ бүппүт буоллаҕына, билигин улахан эбийиэктэрбит тутуулара саҕаланна. Холобур, улахан дьиэни тутаары гыннахпытына, күүстээх хочуолунай наада, улахан хочуолунайы тутаары гыннахха, күүстээх уот, элбэх уу наада, ону таһарга үчүгэй суол ирдэнэр, – диэн Алексей Васильевич эттэ.

2013 сылтан 2020 сылга диэри  Уус Алдан улууһугар 72 эбийиэк үлэҕэ киирбит.  Билигин улуус үрдүнэн уон сэттэ тутуу бара турар.

Баһылык этэринэн оонньуулар чэрчилэринэн материальнай-техническэй тутуу барарын үрдүнэн, духуобунай, өй-санаа өттүнэн эмиэ уларыйыылар киириэхтэрин наадатын тоһоҕолоон эттэ:

—Бастатан туран, улууска оонньуу ыытыллара, иккиһинэн, өрөспүүбүлүкэҕэ автономия 100  сылын бэлиэтиир бырааһынньыкпыт улуус дьонун өйүгэр-санаатыгар патриотическай санааны үөскэтиэхтээх. Бу санааҕа тирэҕирэн, сайдыы инники хайысхатын булар олус наадалаах, – диэн баһылык эттэ.

Санатар буоллахха, улуус олохтоохторун уонна бэрэстэбиитэллэрин оонньууларга анаммыт пуондата тэриллибитэ. Манна хас биирдии баҕалаах, улуус олохтооҕо оонньууларга анаан харчыны биэриэн сөп.

 

Виктория Бястинова, edersaas.ru саайт, «Саха сирэ» хаһыат.

Ааптар хаартыскаҕа түһэриилэрэ.

1
0