Алексей Еремеев: «Тыа хаһаайыстыбатын саҥа мэхэньиисимин саҥаттан ырытан көрүөххэ наада»

Бүгүн, кулун тутар 3 күнүгэр, 10 чаастан Ил Түмэн XXXV  уочараттаах пленарнай мунньаҕа саҕаламмыта. Бэбиэскэҕэ барыта 38 боппуруос баар. Ас-үөл, бородууксуйа өттүнэн куттал суох буолуохтаах диэн боппуруоска сүрүн иһитиннэриини СӨ Бырабыыталыстыбатын бэрэссэдээтэлэ  Андрей Тарасенко оҥордо. Кини чуолаан ити өттүгэр ханнык-туох миэрэлэр ылыллан эрэллэрин туһунан кэпсээтэ.

Бу боппуруоска  Ил Түмэн Бэрэссэдээтэлэ Алексей Ильич Еремеев эрдэттэн сөптөөх үлэни ыытан, тыа хаһаайыстыбата инники өттүгэр бигэ туруктаах буоларыгар санаатын эттэ.  Оттонор сирдэри оҥорон элбэтиигэ бастакы уочарат сөптөөх болҕото ууруллуохтааҕын ыйда. «Бу чааһыгар Нам улууһун холобурдуур буоллахха, Аҕа дойду Улуу сэриитин иннинэ улуус үрдүнэн 50 тыһ. туонна, оттон Сэбиэскэй кэмҥэ 40 тыһ. туоннаны оттууллар эбит. Билигин 21 тыһ. кэриҥэ туонна…  Оттуур сир тиийбэтэ биллэр, онон билиҥҥиттэн  сөптөх үлэни ыытарбыт уолдьаста», — диэн Алексей Ильич эттэ.

Маны тэҥэ,  тыа хаһаайыстыбатын бородууксуйатын бэлэмнээһиҥҥэ былырыын олоххо киирбит саҥа мэхэньиисим эмиэ таарыйылынна.   Ыанар ынах аайы 35 тыһ. солк. көрүү. Былырыыҥҥы туругунан үүтү туттарыы биллэрдик түспүт. Бу боппуруоска Алексей Еремеев «Ааспыт сыллааҕы туругунан, үүтү туттарыы  40 % түспүт.  Манна араас санаалар бааллар.  Сорох ыаллар сайын ынахтарын тарбыйахтарын кытта ыытан кэбиспиттэрэ  эмиэ иһиллэр. Онон саҥа мэхэньиисими өссө төгүл ырытан, сыныйан көрүөххэ наада», — диэн иһитиннэрдэ.

Бары билэрбит курдук, 2022 сыл тохсунньутун ортотуттан саҕалаан Дьокуускай куоракка олохтоох ынах арыытын сыаната балачча үрдээбитин ааһан, өссө атыыга тахсыыта лаппа аҕыйаабыта. Киин куоракка былырыын киилэтэ 500-600 солк. атыылана турбут арыы билигин 1050 солк. диэри үрдээтэ. Ону ааһан, “Сайсары” бааһынай ырыынагар икки-үс сиргэ эрэ баара биллэр. Маны үгүс дьон сайын үүт ситэри ыамматаҕын кытта сибээстииллэр.

СИА хаартыската.