Саха Өрөспүүбүлүкэтин ытыктабыллаах олохтоохторо!
Саха Өрөспүүбүлүкэтин Ил Түмэнин уонна тус бэйэм ааппыттан бука барыгытын Төрөөбүт тыл уонна сурук-бичик күнүнэн истиҥник эҕэрдэлиибин! Төрөөбүт тыл уонна сурук-бичик күнэ быйыл ураты суолталаах – Саха АССР төрүттэммитэ сүүс сыллаах үбүлүөйүн уонна саха норуотун уһулуччулаах уола, саха омук бастакы лингвист-учуонайа, сырдатааччыта, демократа уонна сахалыы суругу-бичиги төрүттээччи, саха тыллаах бастакы үөрэх кинигэлэрин оҥорон таһаарааччы Семен Андреевич Новгородов төрөөбүтэ 130 сылын бэлиэтиибит.
Ону тэҥэ, бары норуоттар уонна омугунан холбоһуктар искусстволарын киэҥник тарҕатар, култуураларын эгэлгэтин, үгэстэрин, история уонна култуура пааматынньыктарын чөл хаалларар туһугар Россия Федерациятыгар 2022 сыл Россия норуоттарын култуураларын нэһилиэстибэтин сылыгар анаммыта. Саха Өрөспүүбүлүкэтигэр 2022 сыл Ийэ сылынан биллэриллибитэ. Хас биирдии киһиэхэ ийэ суолтата сүҥкэн, биһиги төрөөбүт тылбытыгар, дойдубутугар тапталы ийэбит үүтүн кытта тэҥҥэ иҥэринэбит.
Биһиги өрөспүүбүлүкэбитигэр өрөспүүбүлүкэ норуоттарын судаарыстыбаннай уонна дьиҥ таһымнаах тылларын чөл хаалларарга уонна сайыннарарга туһуламмыт судаарыстыбаннай тосхол үлэлиир, тосхол сүрүн хайысхатынан нуучча, саха тылын уонна Хоту төрүт олохтоох аҕыйах ахсааннаах омуктар тылларын билии таһымын үрдэтии буолар.
М.К. Аммосов аатынан Хотугулуу-Илиҥҥи федеральнай университекка уонна РНА Сибиирдээҕи салаатын Гуманитарнай чинчийии уонна Хоту төрүт олохтоох аҕыйах ахсааннаах омуктар кыһалҕаларын институтугар Саха сирин төрүт олохтоох омуктарын тылларын үөрэтэр, чөл хаалларар уонна сайыннарар үлэ ыытыллар.
Өрөспүүбүлүкэ судаарыстыбаннай уонна дьиҥ таһымнаах тылларын сайыннарар, национальнай бэчээт уонна сонуну киэҥник тарҕатыы эйгэтин үлэһиттэрин суолталарын үрдэтэр туһугар 2020 сыллаахха Национальнай бэчээт күнэ олохтоммута. Онтон ыла биһиги Национальнай бэчээт күнүн сыл аайы от ыйын 1 күнүгэр бэлиэтиибит. Төрөөбүт тылынан бэчээттэнэр киэҥ ааҕааччыга туһуламмыт хаһыат, сурунаал таһаарыытын өйүүргэ уонна тарҕатарга ылсан үлэлиибит.
Кэнники сылларга сахалыы киинэ күүскэ сайынна, аан дойду таһымыгар таҕыста. Ити сахалыы киинэни көрөр олохтоох нэһилиэнньэ саха тылынан айымньыны сэҥээрэрин уонна ылынарын тыыннаах туоһута.
Төрөөбүт тыл уонна сурук-бичик күнүнэн эҕэрдэлээн туран төрөөбүт тыл уонна литература учууталларыгар, наука, култуура, искусство үлэһиттэригэр, төрөөбүт тылы ыччат дьоҥҥо киэҥник тарҕатар, төрөөбүт тылга тапталы иҥэрэр дьоммутугар махталбын тиэрдэбин.
Баҕарабын кытаанах доруобуйаны, бары үтүөнү-кэрэни, дьолу-соргуну. Норуоппут тугунан да кэмнэммэт, туохха да тэҥнэспэт сүдү баайын – төрөөбүт тылбытын харыстаан, тупсаран, көлүөнэттэн көлүөнэҕэ бэлэх ууна туруохха.
Саха Өрөспүүбүлүкэтин Ил Түмэнин
Бэрэссэдээтэлэ А.И. Еремеев