Алексей Еремеев үөрэнээччилэри, устудьуоннары уонна учууталлары Билии күнүнэн эҕэрдэлээтэ

Ааптар: 
Бөлөххө киир:

Судаарыстыбаннай Мунньах (Ил Түмэн) бэрэссэдээтэлэ Алексей Еремеев балаҕан ыйын 1 күнүгэр Нам улууһугар Билии күнүгэр анаммыт тэрээһиннэргэ кытынна. Ол туһунан сиһилии манна ааҕыҥ.

Бу айан чэрчитинэн кини Илья Егорович Винокуров аатынан Намнааҕы педагогическай кэллиэскэ сырытта. Бу педагогическай кэллиэскэ өрөспүүбүлүкэ 32 улууһуттан 911 устудьуон сэттэ идэҕэ үөрэнэр. Кэллиэскэ 137 преподаватель уонна үлэһит айымньылаахтык үлэлиир.

Алексей Еремеев устудьуоннары уонна педагогтары саҥа үөрэх дьыла саҕаламмытынан эҕэрдэлээтэ уонна бүгүн орто идэтийбит үөрэхтээһин ситимэ абитуриеннарга олус кэрэхсэнэр буолбутун, эдэр ыччат педагогическай идэлэри талан, инники олоҕун суолун бэлэмниирин туһунан бэлиэтээтэ. Маныаха Намнааҕы педагогическай кэллиэскэ саҥа үөрэх дьылыгар өрөспүүбүлүкэбит 32 улуһууттан 185 оҕо бастакы кууруска киирэн, кэллиэс устудьуона буолбута кэрэһилиир.

Саха сирин парламенын спикерэ педагогическай кэллиэс устудьуоннара сүҥкэн судаарыстыбаннай диэйэтэл Илья Винокуров аатынан киэн тутталларыгар уонна кини дьыалатын салҕааччы патриот буолалларыгар ыҥырда. Илья Винокуров курдук дьон өрөспүүбүлүкэни салайан, норуот дьылҕатын туһугар Саха сирин саамай уустук, ыарахан кэмнэригэр үрдүк эппиэтинэһи сүкпүттэрин санатта. Алексей Ильич Илья Егоровиһы хорсунун уонна норуотугар кыһамньылааҕын ойуччу бэлиэтээтэ. Аҕа дойду Улуу сэриитин кэмигэр саха норуотун хоргуйууттан быыһаабыт киһи быһыытынан дьон өйүгэр-санаатыгар хаалбытын тоһоҕолоон бэлиэтээтэ.

Алексей Еремеев командировктатын туһунан эмиэ кэпсээтэ. Бу уустук балаһыанньаҕа РФ бары субъектара ДНӨ уонна ЛНӨ сирдэригэр-уоттарыгар эйэлээх олоҕу чөлүгэр түһэриигэ үлэлииллэрин аҕынна. Саха Өрөспүүбүлүкэтэ Кировскай куораты кытта шефтэһэр. Бу куорат эбийиэктэрин көрөн баран, Саха сирин парламентарийдарын дэлэгээссийэтэ Украина дьоҕус куораттары сайыннарыыга болҕомтотун ситэ уурбатаҕын бэлиэтээтэ. Сүрүн тутуу сэбиэскэй былаас сылларыгар эрэ ыытыллыбыт. Спикер Украина саамай бөдөҥ бырамыысыланнай киининэн буолбут Донбасска итинник сыһыаннаспыттарын сэмэлээтэ. 1989 сылтан Кировскай  үс оскуолатыгар быстах өрөмүөнү да ыыппатахтар. Ол иһин кинилэргэ көмөлөһөр наадатын эттэ.

Салгыы Алексей Еремеев кэллиэс үөрэтэр саҥа мастарыскыайдарын арыйыыга кытынна. “Эдэр профессионаллар” федеральнай бырайыак “Үөрэхтээһин” национальнай бырайыагынан саҥа үөрэх дьылыгар И.Е.Винокуров аатынан Намнааҕы педагогическай кэллиэскэ үс мастарыскыайы арыйдылар. Быйыл маннык мастарыскыайдары Саха сирин биэс идэтийбит үөрэх тэрилтэтигэр арыйаллара күүтүллэр, итинтэн түөрдүн – өрөспүүбүлүкэ оройуоннарыгар.

Спикер биһиги дойдубутугар үөрэхтээһини сайыннарыыга улахан болҕомто уурулларын бэлиэтээтэ. Орто анал үөрэҕи 2030 сылга диэри сайыннарыы стратегията биэс тумус тутуллар хайысхалаах. Бастакы хардыынан инфраструктураны сайыннарыы, кэллиэстэр уонна техникумнар материальнай-техничесэкй таһымнарын тупсарыы, норуоттар икки ардыларынааҕы ирдэбиллэргэ сөп түбэһэр мастарыскыайдары тэрийии киирэр. Кини “Эдэр профессионаллар” федеральнай бырайыак чэрчитинэн  2024 сылга диэри 5000 аныгы мастарыскыай тэриллэрин туһунан кэпсээтэ. Стратегияҕа саҥа көрүҥнэр эмиэ киирдилэр: кэллиэстэргэ дьоҕус инновационнай тэрилтэлэри, үөрэтэр-производственнай учаастактары  тэрийиэхтэрэ, манна устудьуоннар үөрэҕи уонна үлэни тэҥҥэ дьүөрэлээн, хамнас аахсыахтара.

Намнааҕы кэллиэс WorldSkills Russia кыттар

Норуот дьокутаата Феодосия Габышева Намнааҕы кэллиэс WorldSkills Russia хамсааһыҥҥа кыттарын бэйэтин эҕэрдэ тылыгар бэлиэтээтэ.  Кэллиэс баазатыгар “Инженерный дизайн CAD”  уонна “Оскуолаҕа ойуулуур искусствоны үөрэтии”, “Физическэй култуура, успуорт уонна фитнес” компетенцияларга эрэгийиэннээҕи аһаҕас чөмпүйэнээттэр ыытыллаллар.  2022 сылга федеральнай бырайыак чэрчитинэн кэллиэс “Оскуола иннинээҕи иитии”, “Алын кылаастарга үөрэтии”, “Физическэй култуура, успуорт уонна фитнес” компетенцияларынан мастарыскыайдарын тэрилин саҥардыыга грант ылбыт. Балар аныгы үөрэтэр-производственнай, үөрэтэр-лабораторнай тэриллэринэн, интерактивнай уонна бырагыраамалаах комплекстарынан, аныгы компьютер тэриллэринэн хааччыллыбыттар. Феодосия Габышева Намнааҕы педкэллиэс “Бары  уруһуйдуубут” уопсастыбаннай бырайыагы олоххо киириини сүрүн түстээччинэн буоларын аҕынна. Саҥа кабинеттар уонна мастарыскыайдар көмөлөрүнэн кэрэ эйгэтигэр, эстетикаҕа, нэһилиэнньэ барыта тупсаҕай буолуутугар олук ууруллар. Саамай сүрүнэ – хас биирдии оҕо айар кыаҕын уһугуннарыы.

Преподавателлэр парламентарийдарга мастарыскыайдары арыйан баран кэллиэс WorldSkills Russia стандартарынан аһҕас эксээмэни ыытыыга киининэн буолар статуһу ылар соруктааҕын кэпсээтилэр.   Кинилэр саҥа мастарыскыайдарыгар “Эдэр профессионаллар” (WorldSkills Russia) эрэгийиэннээҕи  чөмпүйэнээттэрин “Инженерный дизайн CAD”, “Физическэй клтуура, успуорт уонна фитнес” компетенцияларга ыытыахтара.

Педкэллиэс бу чөмпүйэнээт кыттыылаахтара Эвелина Максимова, Юлия Бурцева, Лада Софронова ааттарынан киэн туттар. “Учитель, которого ждут” эрэгиийэннэр икки ардыларынааҕы куонкурус призердарынан “Айымньылаах үлэ”  номинацияҕа Дарина Саввина уонна “Физическэй култуура” номинацияҕа Владимр Кириллин буоллулар.

Устудьуоннар уонна преподавателлэр XVII Норуоттар икки ардыларынааҕы «ШКОЛА. УЧИТЕЛЬ. ИСКУССТВО» быыстапкаларыгар Златоуст куоракка педкэллиэс устудьуоннарын 30 үлэтэ  1,2,3 истиэпэннээх дипломнары ыллылар, оттон 24 преподаватель 1 истиэпэннээх дипломанынан буоллулар.

1 №-дээх Нам орто оскуолатыгар

Спикер Алексей Еремеев И.С. Гаврильев аатынан 1 №-дээх Нам орто оскуолатыгар эмиэ сырытта. Бу оскуолаҕа саҥа үөрэх сылыгар 939 үөрэнээччилээх, 84 педүлэһит үлэлиир.  Кини саҥа үөрэх дьыла саҕаламмытынан истиҥник эҕэрдэлээтэ.  Спикер оскуола саҥардыллыбыт дьиэтин көрдө, манна хапытаалынай  өрөмүөн чэрчитинэн дьиэ ис-тас көстүүтүн тупсарбыттар. Тас өттүнээҕи уот-күөс оҥоһуллубут, видеонаблюдение, металлодетектор туруоруллубуттар, киирэр аан таһыгар пандустаах, бастакы этээскэ муостаны оҥорбуттар. Үөрэх тэрилтэтэ 2022 сылтан Үөрэҕи сайыннарыы уонна идэни үрдэтии институтун “Внедрение естественно-научной грамотности“ диэн тиэмэҕэ стажировкатын ыытар былаһааккатынан буолар.  “Иккис омук тыла: кытай, кэриэй, ньиэмэс тыла бырагыраамалар үлэлииллэр. “Мин дойдум Нам улууһа” бырагыраама эмиэ баар. Биир кэлим эксээмэҥҥэ ситиһиилэрдээх.

Н.С.Охлопков аатынан Нам улууһун гимназиятыгар

Алексей Еремеев маны сэргэ Н.С.Охлопков аатынан Нам улууһун гимназиятын дьиэтин-уотун көрдө. Быйыл “Үөрэхтээһиҥҥэ оскуола тиһигин саҥардыы” федеральнай бырагыраама чэрчитинэн үөрэнэр куорпуһу уонна успуорт саалатын хапытаалынайдык  өрөмүөннээтилэр.  Кылгас болдьох иһигэр үөрэх куорпуһун кырыыһатын, тас фасадын, түннүгүн, ититэр ситимин толору уларыттылар.  Муостатыгар билииккэни тэлгээтилэр. Успуорт саалатыгар мас муостаны анал сымнаҕас бүрүөһүҥҥэ уларыттылар.

Нам улууһун гимназиятын тэрийиигэ өрөспүүбүлүкэбит бастакы бэрэсидьиэнэ М.Е.Николаев сүҥкэн өҥөлөөх. 1997 с. гимназия өрөспүүбүлүкэ Бэрэсидьиэнин оскуолатын ситимигэр киирбитэ. Санкт-Петербурга Бүтүн Арассыыйатаҕы үөрэх форумугар “Тыа сирин бастыҥ оскуолата-2015” Бүтүн Арассыыйатааҕы куонкурус лауреатынан буолбута.  “ХИФУ сыл оскуолата” куонкуруһугар кыайбыта. “РФ тыа сирин 200 ТОП оскуолатын “испииһэгэр “СӨ тыа сирин 6 бастыҥ оскуолатын” ахсааныгар киирбитэ.  2021-2022 үөрэх дьылыгар  RAEX рейтининэн өрөспүүбүлүкэ 20 оскуолатын иһигэр баар.

Ил Түмэн пресс-сулууспата

Бэлэмнээтэ Женни Стрюкова

Хаартыска: тустаах саайтан

+1
0
+1
0
+1
0
+1
0
+1
0
+1
0
+1
0