Алексей Еремеев: «Күндү сахам дьоно, уйгулаах ыһыахтарынан!»

Ааптар: 
Бөлөххө киир:

Саха Өрөспүүбүлүкэтин Ил Түмэнин аатыттан уонна тус бэйэм ааппыттан самаан сайын салаллан кэлбитин кэрэһилиир, или-эйэни түстүүр Үрүҥ Тунах Ыһыаҕынан эҕэрдэлиибин!

Саха АССР Үрдүкү Сэбиэтин Президиума 31 сыл анараа өттүгэр, ол эбэтэр 1991 сыллаахха Ыһыаҕы Саха Өрөспүүбүлүкэтин судаарыс­тыбаннай бырааһынньыгынан биллэрбитэ. Билигин саха норуотун ду­хуобунай баайын арыйар, саха култууратын көрдөрөр национальнай бырааһынньыкпыт – Ыһыах дойду үгүс эрэгийиэнигэр ыытыллар буолла. Быйылгы ыһыах Саха АССР төрүттэммитэ 100 сылыгар уонна Саха сирэ модун Арассыыйа састаабыгар киирбитэ 390 сылыгар ананар. Арассыыйа Бэрэсидьиэнин Ыйааҕар сөп түбэһиннэрэн 2022 сыл Арассыыйа норуоттарын култуураларын баайын сылынан биллэриллибитэ быйылгы ыһыах суолтатын өссө үрдэтэр. Сыл бастыҥ тэрээһинигэр Саха сирин бары омуктарын норуоттарын ускуустубата, култууралара, сиэрдэрэ-туомнара уонна үгэстэрэ киэҥ хабааннаахтык көрдөрүллүөхтэрэ.

Өрөспүүбүлүкэ парламена Саха сирин норуоттарын култуураларын баайын харыстааһыҥҥа үгүс үлэни ыытар. 2006 сылтан саҕалаан «Саха Өрөспүүбүлүкэтин төрүт олохтоох норуоттарын эпическэй баайдарын көмүскээһин уонна харыстааһын туһунан» сокуон үлэлиир. Парламент көҕүлээһининэн «ХVII үйэттэн ХХ үйэ саҕаланыытыгар диэри кэмнээҕи Саха сирин норуоттарын материальнай уонна духуобунай култууралара аан дойду түмэллэригэр» диэн каталог тиһигэ бэчээттэнэн тахсыбыта. Маны таһынан эпическэй литература пааматынньыктарын атастаһыы бырайыага ситиһиилээхтик ыытыллар.

Айылҕа уһуктуутун уруйдуур сайыҥҥы бырааһынньыгынан бары үтүөнү, түмсүүлээх буолууну, или-эйэни, дьолу-соргуну баҕарабын!

Алексей Ильич Еремеев,

Саха Өрөспүүбүлүкэтин Ил Түмэнин Бэрэссэдээтэлэ. 

Хаартыска: интэриниэт ситимиттэн.

+1
0
+1
0
+1
0
+1
0
+1
0
+1
0
+1
0