Быыбардыыр учаастактар бары киэһэ аҕыс чааска сабыллан, билигин куоластары ааҕыы бара турар. Быыбар киин хамыыһыйатын бэрэссэдээтэлэ Алексей Ефимов бэлиэтииринэн, “QR” кодтары туһаныы киирбитэ үлэни түргэтитэр.
Санатан эттэххэ, бүгүн өрөспүүбүлүкэ үрдүнэн барыта 806 быыбардыыр учаастак үлэлээтэ. Ол иһигэр, 797 – бастайааннай, 9 – көһө сылдьар (ыраах станцияларга, вахтовай бөһүөлэктэргэ уонна Дьокуускай куоракка икки өрөспүүбүлүкэтээҕи балыыһаҕа). “Быыбар кэмигэр “QR” кодтары туһаныы, бастатан туран, сыыһаны таһаарбат туһугар туттуллар. Бу ньыманан туһанан боротокуоллары ыытыы быдан түргээтиир. Холобур, Дьокуускайга 119 быыбардыыр учаастак баар. Урукку өттүгэр олортон дааннайы хомуйуу сарсыарда аҕыс чааска диэри барар этэ. Былырыын күһүн буолбут быыбарга түүн биир чааска барыллаан түмүгү таһаарбыппыт. Онон бу кодтары туһаныы үлэни түргэтитэр”, — диэн бэлиэтиир Алексей Михайлович.
Оттон быыбарга тахсыбыт сыыһалар тустарынан этэригэр: “Быыбар кэмигэр быыбардааччы быраабын кэһии тахсыбата. Киирбит үҥсүүлэр бары кэмигэр уонна суһаллык көрүллүбүттэрэ”, — диэн иһитиннэрэр.
Саха сиригэр төһө киһи куоластаабыта, ханнык хандьыдаакка төһө куолаһы биэрбиттэрэ түүн үс чааска биллиэҕэ.
Аграфена КУЗЬМИНА, “Саха сирэ” хаһыат, edersaas.ru