Дойду Төрүт Сокуонугар уларытыылары киллэриигэ куоластааһын бүгүн, от ыйын 1 күнүгэр, киэһээ 20.00 чааска түмүктэннэ.
Үлэни-хамнаһы Саха сирин Киин быыбардыыр хамыыһыйа бэрэссэдээтэлэ Алексей Михайлович Ефимов сырдатта:
— Куоластааһын бэс ыйын 25 күнүттэн саҕаламмыта. Сэттэ күн ыытылынна, бүгүн, от ыйын 1 күнүгэр, сүрүн куоластааһын буолла. 18.00 чаастааҕы чахчынан, өрөспүүбүлүкэ үрдүнэн уопсайа 50,4 % куоластааһын буолбутун көрдөрбүтэ, бу коронавирус эпидемиятын кэмигэр, куһаҕана суох. Түмүк өссө тахсыаҕа.
Бу кэм устатыгар өрөспүүбүлүкэҕэ барыта 820 куоластыыр учаастак үлэлээтэ. Тэрээһин коронавирус дьаҥын утары охсуһуу кэмигэр барда, дьон-сэргэ доруобуйатын харыстыырга бары ирдэбил тутуhулунна, — диэтэ.
Алексей Михайлович эппитинэн, куоластааһыны видеонан кэтээн көрүү Дьокуускайга 117 куоластыыр учаастакка ыытыллыбыт. Ыраах уонна суола-ииһэ суох сирдэргэ эрдэ ыытыллыбыт куоластааһынынан барыта 13 тыһыынчаттан тахса киһи хабыллыбыт.
Хаартыска: СИА