Олунньу 8 күнүгэр Россия Наукатын күнүнэн сибээстээн, СӨ наукатын уопсастыбаннаһа А.Пушкин аатынан Нуучча драматическай тыйаатырыгар үөрүүлээх быһыыга-майгыга муһунна.
Людмила Попова, “Саха сирэ” хаһыат, https://edersaas.ru/
Үөрэх уонна наука миниистирэ Владимир Егоров өрөспүүбүлүкэҕэ наука бүгүҥҥү туругун, инники сайдыытын уонна соруктарын туһунан дакылаат аахта. Тэрээһиҥҥэ мустубут СӨ бырабыыталыстыбатын бэрэссэдээтэлин солбуйааччы Алексей Дьячковскай Ил Дархан, СӨ бырабыыталыстыбатын аатыттан эҕэрдэлээн туран, наука сайдыытын историята регион, дойду туруорар социальнай-экономическай сайдыытын соруктарын кытта быһаччы ситимнээх диэн эттэ. “Наука сайдан кэлбит суолун ылан көрөр эбит буоллахпытына, экономика үрдүүрүн хааччыйар эрэ соругу толорбоккут. Эһиги локомотив буолаҕыт. Сайдыыга көҥү көтөр кыаҕы үөскэтэҕит. Наука өрүү инники иһэр”, — диэн күүстээх тыллары эттэ. Наукаҕа, үрдүк үөрэх эйгэтигэр үтүөлэрин, өрөспүүбүлүкэ социальнай-экономическай сайдыытыгар кылаатын уонна уһун сыллаах үтүө суобастаах үлэтин иһин “СӨ наукатын үтүөлээх деятелэ” бочуоттаах аат Россия Наукаларын академиятын Сибиирдээҕи салаатын криолитозона биологическай проблемаларын институтун ирбэт тоҥ экосистематын геофизикаҕа циклин лабораториятын сэбиэдиссэйэ Трофим Максимовка иҥэрилиннэ. Ил Дархан кыһыл көмүс чаһылаах Кырамаататын Н.В.Черскэй аатынан Хотугу дойду хайа дьыалаларыгар институтун дириэктэрин эбээһинэһин толорооччу Владимир Зубков, Ил Дархан өйдөбүнньүк бэлиэлээх Махталын П.И.Мельников аатынан Ирбэт тоҥ проблемаларын үөрэтэр институт геоинформатикаҕа бөлөҕүн салайааччыта Ярослав Торговкин уо.д.а. туттулар.
СӨ Судаарыстыбаннай Мунньаҕын (Ил Түмэн) бэрэссэдээтэлэ Александр Жирков, Саха сирэ киэҥ сиринэн тайаан сытарынан уонна климатическай усулуобуйатынан улахан палеонтологическай саппааһы хаалларбыта научнай чинчийиилэри ыытарга табыгастаах диэн бэлиэтээтэ. “Өрөспүүбүлүкэ бүгүн Н.В.Черскэй, Ю.Г.Шафер, А.Е.Мординов, Г.П.Башарин, В.П.Ларионов о.д.а. курдук наука тэрийээччилэригэр наадыйар. Сахабыт сирин туһугар үлэлиир учуонайдар таһымнара урукку учуонайдар ситиспит таһымнарыттан намтыа суохтаах”, — диэн өрөспүүбүлүкэ научнай уопсастыбаннаһыгар туһаайан эттэ. Итиэннэ В.П.Ларионов аатынан Судаарыстыбаннай бириэмийэлэри, стипендиялары туттартаата.
Людмила Попова, “Саха сирэ” хаһыат, https://edersaas.ru/
Хаартыска: Айаал Черноградов.