РФ Уһук Илини уонна Арктиканы сайыннарыыга миниистирэ Алексей Чекунков ХИФУ инновацияҕа, аныгы технологияҕа бырайыактары билсэн баран, «Бэҕэһээ биһиги технологическай класстердар үлэлэрин көрбүппүт. Бу класстердар биисинэс эйгэтигэр таһаарыылаахтык ылсан эрэллэр. Оттон бүгүн үлэ сүрүн силиһин, акылаатын көрдүбүт. Аныгы класстердарга үлэлиир исписэлиистэри бэлэмниир уонна кинилэр инновацияҕа сыһыаннаах бырайыактарын олоххо киллэрэр кииннэр, лабораториялар үлэлэрин көрдүбүт-иһиттибит. Уһук Илин уокуругуттан тас дойдуларга табаары, бородууксуйаны оҥорон таһаарар кыахтаах инновационнай хампаанньалары төрүттүөхтээхпит.
Уһук Илиҥҥи уокурук Арассыыйа Азията буолар. Билигин аан дойду технологиятын сайыннарыыга инники күөҥҥэ сылдьар лиидэрдэринэн буолаллар. Кинилэр саппаастара, кыахтара олус улахан. Саха сирин биисинэһэ кыаҕа уонна ситиһиитэ дьоһун. ХИФУ аныгы олох тэтимин тутуһан бииргэ хардыылаан иһэр. Маны университет преподавателлэрэ уонна устудьуоннар бииргэ үлэлээн ситиһиллэр. Аан дойдуга таһымнаах полупроводниковай матырыйааллары оҥорууга кыттан, технологическай араас хабааннаах матырыйааллары олоххо киллэриигэ сөптөөх суолу тутуһуу барбыта харахха быраҕыллар. Лабораториялар, арктическай инновационнай киин эдэр исписэлиистэрэ уонна устудьуоннар күүскэ үлэлииргэ, саҥаны айарга санаалаахтара тута көстөр. Кинилэр уопуттарын Арктиканы сайыннарыыга хайаан да туһаныахпыт», — диэн санаатын үллэһиннэ.
Александр Тарасов, «Саха сирэ» хаһыат, edersaas.ru