Алексей Чекунков: «Саха сирин айти-пааркатын резиденнэригэр ситиһиин баҕарабын»
Уһук Илин уонна Арктика сайдыытын миниистирэ Алексей Чекунков бүгүн “Дьокуускай” айти-пааркаҕа сылдьан Саха сирин айти-технологияҕа бырайыактарын кытары билистэ.
Алексей Чекунков бастаан паарка резиденнэрин үлэтин көрдө-иһиттэ. Ол курдук, “Ведроид” диэн ааттаах роботы, “ДВИА” хамаандата оҥорбут “Мамонтодус” диэн остуол оонньуутун, “АЭБ-айти” хампаанньа мэдиссиинэҕэ ылсан үлэлээбит бырайыагын, ону сэргэ “АЛРОСА-айти”, “Алтан” оҕону программированиеҕа үөрэтэр киини, компьютернай графикаҕа өҥөнү оҥорор академияны, “Статус” диэн пегогтары, талааннаах оҕолору кытары үлэлэһэр киини, о.д.а. көрдө.
Айти-паарка иһинэн бүгүн миниистиргэ Саха сиригэр оҥоһуллубут атын бырайыактары сүрэхтээтилэр. Холобур, “Гого Технолоджи” тэрилтэ “GoGo курьер” диэн бырайыагын билиһиннэрдэ. Бу хампаанньа биһиэхэ былырыыҥҥыттан саҕалаан үлэлиир. “Сайберия” хамаандата коронавирус дьаҥыттан сэлликкэ ылларыыныы көрөр саҥа бырайыагы толкуйдаан киллэрбитэ. “Skillometer” диэн тиэхиньикэҕэ сыһыаннаах анал бырагырааманы “Софтвей+” хамаандата оҥорбута.
Миниистир Алексей Чекунков айти-паарка резиденнэрин бырайыактарын үрдүктүк сыаналаата уонна үлэлригэр ситиһиини баҕарда.
Санатан эттэххэ, Саха сиригэр бастакы айти-паарка 2018 сыллаахха ахсынньыга аһыллыбыта. Бу паарка Уһук Илин эрэгийиэннэриттэн бастакынан тэриллибитэ. Сүрүн сыалынан айти-технология эйгэтигэр баар бары бырайыактары биир сиргэ түмүү буолар. Паарка манна үлэлэһэр хампаанньаларга үбүлээһин, үөрэх, база өттүнэн көмөлөһөр, Арассыыйа, аан дойду таһымыгар тахсалларыгар тирэҕинэн буолар.
Айти-паарка 100 резидени, ол эбэтэр бу эйгэҕэ үлэлиир хампаанньалары, бэйэтин тула мунньуон сөп. Билигин манна үлэлэһэ сылдьар резиденнэр сүрүннээн мобильнай сыһыарыылары, компьютерга үлэлииргэ куттала суох платформаны оҥорууга, роботехникаҕа, айти-үөрэхтээһиҥҥэ, биотехнологияҕа, доруобуйа харыстабылыгар, тыа хаһаайыстыбатыгар цифровой эйгэни киллэриигэ, о.д.а. хайысхаларынан үлэлии сылдьаллар.
Билигин Дьокуускай куораты таһынан улуустарга анал кииннэр аһыллан үлэлииллэр. Өрөспүүбүлүкэ үрдүнэн билигин улуустар кииннэригэр уон биир айти-киин үлэлиир. Ол курдук, Сунтаарга, Мэҥэ Хаҥаласка, Намҥа, Орто Халымаҕа, Ньурбаҕа, Уус Алдаҥҥа, Хаҥаласка, Мирнэйгэ, Кэбээйигэ, Чурапчыга үлэлииллэр уонна бу соторутааҕыта Горнай улууһугар Бэрдьигэстээххэ аһыллыбыта.
Аграфена КУЗЬМИНА