Александров, Булатов уонна Устинов Арассыыйа чөмпүйэнээтигэр тустуохтара
Брянскайтан үөрүүлээх сонун кэллэ: «Локомотив» уопсастыба чөмпүйэнээтигэр үс бөҕөспүт кыайыылааҕынан тахсан, Арассыыйа чөмпүйэнээтигэр кыттар быраабы ылла.
Муус устар 19-21 күннэригэр Брянскайга ыытыллыбыт «Локомотив» физкультурнай-спортивнай уопсастыба чөмпүйэнээтигэр Саха сириттэн уон бөҕөс туһунна. Үс күннээх күрэхтэһии түмүгүнэн Ньургун Александровпыт (61 кг), Дьулустаан Булатовпыт (65 кг), Герман Устиновпыт (70 кг) ыйааһыннарыгар кыайыылааҕынан тахсан, кыһыл көмүс мэтээллэри сэргэ дойду чөмпүйэнээтигэр кыттарга путевкалары ыллылар.
Оттон 57 киилэҕэ диэри ыйааһыҥҥа Федор Постников, 61 киилэлээхтэргэ Айтал Захаров иккис буоллулар. Түмүк хапсыһыыга Постников уопуттаах Нодар Арабидзеҕа (Брянскай) 1:3 ахсаанынан баһыйтарда, оттон Захаров биир дойдулааҕар Ньургун Александровка 0:5 ахсаанынан хоттордо.
Быйаман Яковлев (57 кг), Айсен Никифоров (57 кг), Владислав Кривошапкин (61 кг), Христофор Потапов (61 кг), Дьулустаан Сивцев (74 кг) уонна Ньургун Сергин (92 кг) боруонса мэтээллэр хаһаайыннарынан буоллулар.
Онон Ньургун Александров, Дьулустаан Булатов, Герман Устинов Арассыыйа чөмпүйэнээтигэр тустуохтара. Билиҥҥитэ дойду түһүлгэтэ от ыйын 25-30 күннэригэр Красноярскайга ыытыллыа диэн буолар.
Роман Попов, «Саха сирэ» хаһыат