«Сахамедиа» ыытар «Өлүөнэ муостатын уруһуйдуохха» куонкуруһун чэрчитинэн дизайнер худуоһунньук Александра Неустроева оҕолорго босхо маастар-кылаас ыытта.
Маастар-кылаас бүгүн, олунньу 21 күнүгэр, өрөспүүбүлүкэтээҕи медиа-кииҥҥэ буолла. Александра Неустроева Дьокуускайдааҕы художественнай училищеҕа уонна Оҕо искусствотын оскуолатыгар преподавателинэн үлэлиир. Кини мустубут оҕолорго живопись курдук ыарахан көрүҥү билиһиннэрдэ, сибэкки букетын уруһуйдаатылар.
«Бүгүн оҕолорго живопись диэн тугун быһаарыам, маны уруһуйдуур тиэхиньикэтин кэпсиэҕим. Аан дойду кэрэ аҥаардарын бырааһынньыгын көрсө сибэкки букетын уруһуйдуохпут«, — диир маастар-кылаас ыыта кэлбит Александра Неустроева.
Маастар-кылаас кэнниттэн баҕалаах оҕолор Өлүөнэ муостатын уруһуйдаан куонкуруска кыттыахтарын сөп. Биэс кыайыылааҕы быһаарыахтара, бастыҥнар «Океан» Бүтүн Арассыыйатааҕы оҕо киинигэр сынньана барарга путвеканан наҕараадаланыахтара. Бу куонкуруска 14 сааһыгар диэри оҕо кыттар. Түмүк бэс ыйын 1 күнүгэр биллиэҕэ. Сиһилии бырайыак салайааччытыттан Прокопий Бубякинтан ыйыталаһыаххытын сөп: 8-964-416-50-00.
Маннык хабааннаах маастар-кылаастары «Сахамедиа» нэдиэлэ аайы ыытар былааннаах. Бастакы маастар-кылаас тохсунньуга буолбута.
edersaas.ru
Андрей Сорокин хаартыскаҕа түһэриилэрэ.